فضائی آلودگی سے پھیپھڑوں کے کینسر کا انکشاف

پھیپھڑوں کا کینسر، دنیا بھر میں کینسر کی سب سے عام قسم ہے اور عام طور پر اسکی بنیادی وجہ تمباکو نوشی کو سمجھا جاتا ہے۔

تاہم حالیہ برسوں میں زیادہ تر ایسے افراد میں پھیپھڑوں کے کینسر کی تشخیص ہوئی ہے جو زندگی بھر تمباکو نوشی سے دور رہے اور اعداد و شمار کے مطابق ایسے افراد کی موت دنیا بھر میں کینسر سے ہونے والی ہلاکتوں میں 5 ویں نمبر پر ہے۔ اس صورتحال کے سامنے آنے کے بعد ہونے والی ایک تحقیق میں انکشاف ہوا کہ اسکی بنیادی وجہ فضائی آلودگی ہے۔

امریکا کی ایموری یونیورسٹی کے تحت ہونے والی تحقیق میں اس بات کی تصدیق تو کافی پہلے ہو چکی تھی کہ فضائی آلودگی پھیپھڑوں کے کینسر کا خطرہ بڑھانے والا اہم ماحولیاتی عنصر ہے، جبکہ حالیہ تحقیق کے دوران فضا میں ایسے چھوٹے مرکبات میٹا بولائٹس کو دریافت کیا گیا جس سے جسم کے ورم، تکسیدی تناؤ، زہریلے مواد کے اخراج اور توانائی کے میٹابولزم جیسی صلاحیتیں متاثر ہوتی ہیں اور پھیپھڑوں کے کینسر کا خطرہ بڑھتا ہے۔

محققین نے بتایا کہ فضائی آلودگی اور پھیپھڑوں کے درمیان مضبوط تعلق ہے۔ کیلیفورنیا یونیورسٹی کی ایک تحقیق میں ماضی میں ہونے والی 3 ہزار تحقیقی رپورٹس کے نتائج کا تفصیلی تجزیہ کیا گیا۔ جسکے مطابق فضا میں موجود پلاسٹک کے ننھے ذرات سے بانجھ پن، آنتوں کے کینسر، پھیپھڑوں کے ناقص افعال اور ورم جیسے طبی مسائل کا خطرہ بڑھتا ہے۔

تحقیق میں بتایا گیا کہ یہ ننھے ذرات پھیپھڑوں کے ٹشوز کی گہرائی میں پہنچ جاتے ہیں اور ایسا ماحول پیدا کرتے ہیں جس سے ڈی این اے کو نقصان پہنچتا ہے اور خلیات میں تبدیلیاں آتی ہیں۔یہ دونوں عناصر کینسر کا شکار بنانے میں اہم کردار ادا کرتے ہیں۔

محققین نے بتایا کہ جب ان ذرات کو سانس کے ذریعے نگلا جاتا ہے تو یہ پھیپھڑوں کے ٹشوز کی گہرائی میں غائب ہو جاتے ہیں، جہاں وہ دائمی ورم اور تکسیدی تناؤ کا باعث بنتے ہیں۔ جسکے نتیجے میں پھیپھڑوں کے کینسر کا خطرہ بڑھتا ہے۔