دوا اصلی ہے یا جعلی؟ شہریوں کیلیے تصدیق کا آسان طریقہ کار سامنے آگیا

اب دوا کی تصدیق کا عمل ہر شہری میڈیکل اسٹور پر ہی کر سکے گا وفاقی وزرات صحت نے 60 دن کے اندر تمام ادویات پر کیو آر کوڈ لگانے کی ہدایت کر دی۔

بار کوڈ یا کیو آر کوڈ مختلف موٹائی کی کالی اور سفید لائنوں پر مشتمل ایک پیٹرن ہو تا ہے جو کسی بھی پروڈکٹ یا معلومات کی تفصیل کو ظاہر کرنے کا ایک ایسا طریقہ کار ہے جسے کمپیوٹر یا اسکینر کی مدد سے پڑھا جا سکتا ہے۔

اسکا بنیادی مقصد کسی چیز کی فوری اور درست ڈیجیٹل شناخت کرنا ہوتا ہے۔ ہر بار کوڈ کے پیچھے ایک مخصوص نمبر یا کوڈ ہوتا ہے۔ جب اسکینر اس پر روشنی ڈالتا ہے، تو یہ لکیریں کمپیوٹر کو پروڈکٹ کا نام، قیمت، کمپنی کا ڈیٹا اور دیگر تفصیلات بھیجتی ہیں۔ اسکے استعمال سے بلنگ یا اسٹاک کا حساب کتاب رکھنے میں مدد ملتی ہے اور ہاتھ سے ٹائپ کرتے وقت ہونے والی غلطیاں ختم ہو جاتی ہیں۔

ان الیکٹرانک کوڈز کی دو اقسام ہو تی ہیں ون ڈی یعنی بار کوڈ جس میں سیدھی متوازی لکیریں ہوتی ہیں جو عام طور پر پراڈکٹ پر لگی ہو تی ہے، اس میں صرف ٹیکسٹ یا نمبر محفوظ ہوسکتے ہیں۔ جبکہ دوسری قسم ٹو ڈی ہے جو اسکوائر شیپ میں جیو میٹرک پیٹرن یا نقطوں کی شکل میں ہوتا ہے جسے عام طور پر کیو آر کوڈ کہا جاتا ہے اسمیں زیادہ تفصیلی معلومات ، ویب سائیٹ لنک ، تصاویر اور دیگر معلومات محفوظ کی جاسکتی ہیں۔

بار کوڈز کو پڑھنے، ڈیٹا کمپیوٹر تک پہنچانے یا معلومات تک رسائی کے لئے لیزر اسکینر، امیج اسکینریا اسمارٹ فون کے کیمرے اور اسکینر ایپس کا استعمال کیا جاتا ہے ، عام استعمال کے لئے بار کوڈ یا کیو آر کوڈ آن لائن اور ایپ اسٹور پر دستیاب فری ایپس کے زریعے باآسانی بنائے جا سکتے ہیں۔