-
-
دنیا بھر میں بچوں پر سوشل میڈیا اکاونٹس بنانے اور اسکے استعمال پر پابندیوں کا رجحان تیز ہو گیا ہے، اسکی بنیادی وجہ سوشل میڈیا کے بچوں کے زہنی صحت پر پڑنے والے خطرناک اثرات، آن لائن ہراسانی، نامناسب مواد، سائبر بُلیئنگ، ذہنی دباؤ اور سوشل میڈیا کے دیگر منفی اثرات شامل ہیں اور پابندی کا مقصد بچوں کو ان سے محفوظ رکھنا ہے۔
خبر رساں ایجنسی روئٹرز کے مطابق یو اے ای نے سوشل میڈیا پلیٹ فارمز کے استعمال کیلیے کم از کم عمر 15 سال مقرر کر دی۔ اس سے کم عمر بچوں کے ذاتی سوشل میڈیا اکاؤنٹس بنانے، استعمال کرنے یا چلانے پر پابندی ہوگی۔
یو اے ای حکومت کے مطابق 15 اور 16 سال کی عمر کے بچوں کو سخت حفاظتی اقدامات کے تحت سوشل میڈیا پلیٹ فارمز استعمال کرنے کی اجازت ہوگی، جن میں عمر کے لحاظ سے موزوں مواد کے کنٹرولز، نامعلوم صارفین کے ساتھ بات چیت پر پابندی، اسکرین ٹائم مینجمنٹ ٹولز اور والدین کی نگرانی کے فیچرز شامل ہیں۔
سوشل میڈیا پلیٹ فارمز کو بھی پابند کیا گیا ہے کہ وہ 15 سال سے کم عمر بچوں کے بنائے گئے اکاؤنٹس کو بلاک کریں اور عمر کی تصدیق کے نظام کو بائی پاس کرنے سے روکیں۔ اس سے قبل آسٹریلیا، ملائیشیا اور انڈونیشنیا اسی نوعیت کا قانون نافذ کر چکے ہیں جبکہ والدین و ماہرین کی تشویش کے بعد یورپ، ایشیا و لاطینی امریکا میں بھی سخت قوانین پر غور ہو رہا ہے۔
برطانیہ میں 2027 سے جبکہ ڈنمارک میں رواں سال نومبر سے پابندی کا اطلاق ہو گا۔ چین میں بھی مائنر موڈ کے نام سے ایک پروگرام نافذ ہے، فرانس نے اس حوالے سے بل منظور کر لیا ہے۔ یونان ، ناروے اور اسپین بھی اسی طرح کے اقدامات کے قریب ہے، جبکہ جرمنی میں 13 سے 16 سال اور اٹلی میں14 سال سے کم عمر بچوں کو سوشل میڈیا اکاؤنٹ بنانے کے لیے والدین کی اجازت لازمی ہے۔
