-
-
جاپانی قونصل خانہ کراچی کی جانب سے پاکستان جاپان کلچرل ایسوسی ایشن سندھ (پی جے سی اے) اور پاکستان جاپان بزنس فورم (پی جے بی ایف) کے اشتراک سے جاپان فیسٹیول (جاپان فیسٹ) 2025 کا انعقاد کیا گیا۔
بیچ لگژری ہوٹل میں منعقد ہونے والا یہ تہوار جاپان اور پاکستان کے درمیان دیرینہ دوستی کو اجاگر کرنے کے ساتھ ساتھ ثقافتی سرگرمیوں، فنکارانہ نمائشوں اور پرفارمنسز کا حسین امتزاج تھا۔
جاپان فیسٹ 2025 میں رنگا رنگ سرگرمیوں پیش کی گئی، جن میں کاس پلے مقابلہ، جاپانی روایتی رقص بون اوڈوری، اور ایک موسیقی کنسرٹ شامل تھا جس میں جاپان اور پاکستان کے فنکاروں نے مشترکہ طور پر شرکت کی، فیسٹیول میں ایکی بانا، بونسائی نمائش، دلچسپ کھیل اور اوریگامی بھی شامل تھے، جس نے شرکاء کو جاپان کی ثقافتی اور فنکارانہ وراثت کا قریب سے مشاہدہ کرنے کا موقع فراہم کیا۔
مزید پڑھیں:جاپانی قونصل خانہ کراچی کا آرٹس کونسل میں جاپانی فلم فیسٹیول 2025 کا آغاز
جاپانی قونصل جنرل کراچی، ہاتوری مَاسارو نے مہمانوں کا خیرمقدم کیا اور جاپان اور پاکستان کے عوام کے درمیان باہمی تفہیم کو گہرا کرنے میں ثقافتی تبادلے کی اہمیت پر زور دیا۔ اس موقع پر انہوں نے کہا کہ “جاپان فیسٹ” ایک بامعنی پلیٹ فارم بن چکا ہے جو نہ صرف جاپانی ثقافت کے تجربے کا موقع فراہم کرتا ہے بلکہ عوام کے ساتھ دوستی کو بھی فروغ دیتا ہے۔
اعلامیے کے مطابق جاپانی قونصل خانہ کراچی تمام شرکاء، شراکت داروں اور حاضران کا دلی شکریہ ادا کرتا ہے جنہوں نے جاپان فیسٹ 2025 کو ایک یادگار موقع بنایا۔ جاپانی قونصل خانہ مستقبل میں جاپان اور پاکستان کے درمیان ثقافتی تبادلے اور دوستی کو مزید مستحکم بنانے کے لیے پُرامید ہیں۔
