-
-
کراچی میں بوندا باندی سے موسم خوشگوار ہوگیا۔ محکمہ موسمیات کا کہنا ہے کہ آئندہ 24 گھنٹوں کے دوران شہر قائد میں مطلع ابرآلود رہے گا اور مختلف علاقوں میں ہلکی بارش یا بوندا باندی بھی متوقع ہے۔
موسم کا حال بتانے والوں کا کہنا ہے کہ شہر میں آج دن بھر ٹھنڈی سمندری ہوائیں چلتی رہیں گی، شہر کا موجودہ درجہ حرارت 28 ڈگری سینٹی گریڈ ہے، کم سے کم درجہ حرارت 27 ڈگری ریکارڈ ہوا ہے۔ محکمہ موسمیات کے مطابق زیادہ سے زیادہ 31 ڈگری رہنے کا امکان ہے جبکہ جنوب مغربی سمت سے 24 کلو میٹر فی گھنٹہ کی رفتار سے ہوائیں چل رہی ہیں، ہوا میں نمی کا تناسب 73 فیصد ہے۔
مزید پڑھیں:کراچی کا مطلع ابر آلود رہنے کا امکان، رات کو مختلف علاقوں میں بارش متوقع
دوسری جانب محکمہ موسمیات نے اسلام آباد راولپنڈی سمیت مختلف علاقوں میں گرج چمک کے ساتھ بارش کی پیشگوئی کردی، اسلام آباد، خطہ پوٹھوہار، شمال مشرقی پنجاب، بالائی خیبر پختونخوا،کشمیر اور ملحقہ پہاڑی علاقوں میں چند مقامات پر تیز ہواؤں اور گرج چمک کے ساتھ بارش ہونے کی توقع ہے۔
اسلام آباد میں چند مقا مات پر تیز ہواؤں اور گرج چمک کے ساتھ بارش کاامکان ہے، راولپنڈی، مری، گلیات، اٹک، جہلم، لاہور، چکوال، گجرات، گوجرانوالہ، سیالکوٹ، نارووال، قصور، شیخوپورہ، حافظ آباد اور گرد و نواح میں چند مقامات پر بارش ہونے کی توقع ہے۔
سوات، دیر، کوہستان، بٹگرام، ہری پور، نوشہرہ، مانسہرہ، ایبٹ آباد اور گرد و نواح میں چند مقامات پر بارش کا امکان ہے، بلوچستان کے علاقے خضدار، ژوب، موسیٰ خیل اور گر د و نواح میں گرج چمک کے ساتھ بارش ہونے کی توقع ہے۔
