ریفرنڈم کیا ہے اور یہ عمل کس طرح انجام پاتا ہے؟

ملک میں ایک بار پھر نئے صوبوں کے قیام کی بحث زور و شور سے جاری ہے، بعض حلقے اس حوالے سے کسی حتمی فیصلے پر پہنچنے کے لئے ریفرنڈم کی تجویز بھی دے رہے ہیں۔

ریفرینڈم ایک ایسا براہِ راست جمہوری عمل ہے جس میں کسی اہم قومی، آئینی یا علاقائی معاملے پر فیصلہ منتخب نمائندوں کے بجائے براہِ راست عوام کے ووٹ سے کروایا جاتا ہے۔ جسکے لئے عام طور پر عوام کو ایک واضح سوال دیا جاتا ہے، مثلاً کیا آپ اس تجویز سے اتفاق کرتے ہیں؟ ہاں یا نہیں؟

یہی عمل رینفرنڈم کو عام انتخابات سے مختلف بناتی ہے یعنی الیکشن میں عوام، نمائندے منتخب کرتے ہیں، جبکہ ریفرنڈم میں عوام کسی مخصوص فیصلے پر براہِ راست ووٹ دیتے ہیں۔

ماہرین آئین و قانون کے مطابق دستور پاکستان کے آرٹیکل اڑتالیس شق چھ اور آرٹیکل اڑتالیس شق سات میں وزیر اعظم کو ریفرنڈم کرانےکا اختیار ہے۔ جسکے تحت وزیراعظم کو معاملہ پارلیمنٹ کے مشترکہ اجلاس کے سامنے پیش کرنا اور اسکی منظوری لینا ہوتی ہے منظوری کے بعد سوال تیار کیا جاتا ہے، ایک خاص دن عوام ووٹ کاسٹ کرتے ہیں اور پھر اسکا نتیجہ جاری کر دیا جاتا ہے۔

پاکستان کی تاریخ میں اب تک دومرتبہ قومی نوعیت کے ریفرنڈمز ہو چکے ہیں پہلا 1984 میں صدر ضیا الحق کی اسلامائزیشن پالیسی اور صدارت کے تسلسل کو قائم رکھنے سے متعلق اور دوسرا 2002 میں صدر پرویز مشرف کو مذید پانچ سال صدر کے عہدے پر برقرار رکھنے سے متعلق تھا۔

ماہرین کے مطابق اصولی طور پر ریفرینڈم عوامی رائے جاننے کا ایک موثر زریعہ ہو سکتا ہے لیکن ہر معاملے میں یہ طریقہ ضروری نہیں کہ بہترین ہو۔ جبکہ بعض ماہرین کا کہنا ہے کہ اگر کسی مسئلے پر معاشرہ تقسیم ہو تو ریفرینڈم واضع عوامی مینڈیٹ دے سکتا ہے۔