نجی اداروں کے ملازمین بھی حکومتی طبی اور مالی مراعات کے حق دار

ہم میں سے شاید اکثر لوگ اس بات سے واقف نہیں کہ فیکٹری ورکرز اور نجی اداروں میں کام کرنے والے ملازمین بھی دوران ملازمت بے شمار حکومتی طبی اور مالی مراعات کے حق دار ہو تے ہیں۔

جی ہاں اگر آپ کسی فیکٹری، چھوٹے کارخانے یا کسی بھی قسم کی پرائیویٹ جاب کرتے ہیں تو قانون کے مطابق حکومت آپ کو بھی دوران ملازمت بیماری، حادثے یا دیگر مسائل کی صورت میں مالی اور طبی سہولیات فراہم کرنے کی پابند ہے مگر شعور اور آگاہی نہ ہونے کی وجہ سے ہم اس سے محروم رہ جاتے ہیں۔

سندھ میں یہ نظام Sindh Employees’ Social Security Institution (SESSI)کے تحت چلتا ہے۔ قانون کے مطابق اگر کسی ادارے میں پانچ یا ذائد ملازمین کام کرتے ہیں تو اسکی رجسٹریشن لازمی ہے۔ سیسی کے رجسٹرڈ ملازمین کو دو طرح کے فائدے دیے جاتے ہیں ایک مالی فائدہ ہے اور دوسرا میڈیکل فیسیلیٹی میڈیکل فیسیلیٹی ورکر اور اسکی پوری فیملی کو فراہم کی جاتی ہے یعنی بیوی بچوں اور والدین سب کو او پی ڈی سے لے کر ایڈمیشن تک اور اسکی کوئی لمٹ بھی نہیں ہے ساتھ دوائیں بھی مفت فراہم کی جاتی ہیں، اور اگر سیسی کے اسپتالوں میں کوئی سہولت موجود نہ ہو تو علاج صوبے کے 14 بڑے نجی اسپتالوں میں بھی کرایا جاتا ہے۔

سیسی اسپتالوں کے ڈاکٹر مریض کی کنڈیشن دیکھتے ہوئے 121 دن تک کی چھٹی تجویز کرسکتے اور اس دوران سیسی، ورکر کو اسکی تنخواہ کا 75 فیصد ادا کر تا ہے۔ اسی طرح اگر کوئی ورکر کام کے دورن زخمی ہو جاتا ہے تو اسے 180 دن کی چھٹی اور مکمل تنخواہ ادا کی جاتی ہے، ورکر خاتون کو زچگی کی صورت میں مکمل علاج کی سہولت، اخراجات، اور چھٹی کی صورت میں مکمل تنخواہ کی ادائیگی کا بھی سیسی ذمہ دار ہوتا ہے ۔

سوشل سیکیورٹی میں آجر یعنی فیکٹری اونر یا نجی کمپنی کے مالک کی رجسٹریشن ہو تی ہے جو اپنے ملازمین کو رجسٹرڈ کر تا ہے اور مالک ہی اپنےملازمین کے مالی کنٹری بیوشن کی ادائیگی کا بھی ذمہ دار ہو تا ہے جو عام طور پر ملازم کی تنخواہ کا چھ فیصد ہو تا ہے۔

سیسی حکام کے مطابق ورکررجسٹریشن نہ ہونے کی صورت میں سیسی کے دفتر جاکر شکایت درج کراسکتا ہے۔ درخواست گزار کا نام خفیہ رکھا جاتا ہے۔ آپ اپنی شکایت 111-173-774،0800-33772 یا ای میل ایڈریس helpdesk@sessi.gov.pk پر بھی کر سکتے ہیں۔

قانون کے مطابق سوشل سیکیورٹی میں آپ خود سے رجسٹرڈ نہیں ہو سکتے تاہم 2021 میں سوشل سیکیورٹی قوانین میں کچھ ترامیم کی گئیں ہیں جس کے تحت سیلف ایمپلائیڈ ، ڈومیسٹک ورکر، ہوم بیسڈ ورکرز خود کو رجسٹرڈ کراسکتے ہیں تاہم اس پر ابھی کام جاری ہے۔