وزیر اعظم پاکستان اپنا گھر اسکیم کیا ہے، کون لوگ اہل ہیں؟

اب اپنے گھر کاخواب ہو گا پورا، ملک بھر میں کم آمدنی والے افراد کے لیے وزیراعظم اپنا گھر پروگرام کے تحت درخواستوں کی وصولی اور قرض کا اجراء شروع ہو گیا اسکیم کے تحت کروڑ روپے تک قرض کا حصول ممکن ہے۔

گھر کی کل قیمت کا کم از کم10 فیصد آپ کو خود ادا کرنا ہوگا، باقی رقم بینک، قرض کی صورت میں دے گا جسکی واپسی 20 سال میں کرنا ہو گی۔ قرض کی چار کیٹیگری بنائی گئی ہے، 25 لاکھ ، 50 لاکھ ، 75 لاکھ اور ایک کروڑ روپے۔

شیڈول کے مطابق 25 لاکھ قرض پر ماہانہ قسط 16،499 روپے، 50 لاکھ پر 32,997 روپے، 75 لاکھ پر 49,497 روپے اور 1 کروڑ روپے پر ماہانہ قسط 65,996 روپے ادا کرنا ہوگی۔ پہلے 10 سال کے لیے 5 فیصد شرح منافع مقرر کی گئی ہے جبکہ اگلے 10 سال کے لیے شرح سود مارکیٹ ریٹ کے حساب سے ہوگی۔

یہ پروگرام ملک کے تمام صوبوں، آزاد کشمیر اور گلگت بلتستان میں نافذ کیا گیا ہے۔ قرض کی رقم سے آپ بنا بنایا گھر، فلیٹ یا اپارٹمنٹ خرید سکتے ہیں، خالی پلاٹ خرید سکتے ہیں اور پہلے سے موجود پلاٹ پر گھر کی تعمیر بھی کر سکتے ہیں۔ دونوں کاموں کے لیے ایک ساتھ قرض حاصل کرنے کی بھی سہولت موجود ہے۔

شرائط کے مطابق گھر کی صورت میں اسکا کل رقبہ 10 مرلہ یعنی2720 مربع فٹ سے زیادہ نہ ہو جبکہ تیار اپارٹمنٹ یا فلیٹ کے رقبے کی حد 1500 اسکوائر فٹ رکھی گئی ہے۔ درخواست گزار کا قومی شناختی کارڈ کا حامل، 20 سے 65 سال کا پاکستانی شہری ہونا لازمی ہے، جسکی تنخواہ یا ماہانہ آمدنی کم از کم 40 ہزار ہو۔

درخواست دہندہ پہلی بار گھر خرید رہا ہو اور پہلے سے کسی بینک کا مقروض نہ ہو، کم آمدنی کی صورت میں کسی قریبی رشتہ دار کو شریک درخواست گزار بنایا جاسکتا ہے تاکہ مجموعی آمدنی کو یکجا کر کے قرض حاصل کرنے میں آسانی ہو۔

درخواست دینے کے لئے آفیشل ویب سائیٹ (https://apnaghar.gov.pk/) پر جائیں رجسٹریشن کے بعد لاگ ان کریں اپلائی فار لون کو کلک کر کے فارم مکمل کریں اور جمع کر دیں۔ آپ اپنے قریبی کمرشل بینک، اسلامک بینک یا ہاؤس بلڈنگ فنانس کمپنی کی برانچ میں جا کر بھی فارم حاصل کر سکتے ہیں۔ بینک ایک ماہ میں منظوری دینے کا پابند ہوگا۔

درخواست منظور ہونے کی صورت میں بینک آپ کےنام پر رقم فراہم کرے گا یعنی رجسٹری یا الاٹمنٹ لیٹر پر نام آپ کا ہی درج ہوگا۔ تاہم قرض کی مکمل واپسی تک بینک گھر کے اصل کاغذات اپنے پاس بطور ضمانت محفوظ رکھے گا۔ منصوبے کے تحت پانچ سال کے دوران پانچ لاکھ گھروں کی تعمیرکے لئے قرض فراہم کیا جائے گا، منصوبے کے لئے 32 کھرب روپے کی رقم مختص کی گئی ہے۔