-
-
سال 2025 پاکستان کے لیے ایک افسوسناک اور دل گرفتہ سال بھی ثابت ہوا۔ اس برس پاکستانی شوبز، سیاست، میڈیا اور ڈیجیٹل دنیا سے تعلق رکھنے والی کئی معروف اور محبوب شخصیات ہم سے جدا ہو گئیں، جن کی وفات نے مداحوں اور اہلِ فن کو گہرے دکھ میں مبتلا کر دیا۔
سیاست، کھیل، اداکاری، کھانا پکانے، سوشل میڈیا اور ٹیلی وژن کے شعبوں سے وابستہ کئی نامور شخصیات اس سال ہمیشہ کے لیے خاموش ہو گئیں۔
سیاسی شخصیات:
عرفان صدیقی
پاکستان مسلم لیگ (ن) کے سینیٹر عرفان صدیقی مختصر علالت کے بعد 10 نومبر کو انتقال کر گئے۔ عرفان صدیقی نے سیاست میں باقاعدہ قدم 2013 کے بعد رکھا، جب انہیں سابق وزیرِاعظم محمد نواز شریف کا مشیر برائے قومی امور مقرر کیا گیا۔ انہوں نے وزیرِاعظم کے قریبی مشیر کے طور پر قومی پالیسیوں، سیاسی بیانیے، اور فکری حکمتِ عملی کی تشکیل میں اہم کردار ادا کیا۔
آغا سراج درانی:
سندھ اسمبلی کے سابق اسپیکر و پاکستان پیپلز پارٹی (پی پی پی) کے سینئر رہنما آغا سراج درانی بھی علالت کے بعد 72 سال کی عمر میں 15 اکتوبر کو انتقال کرگئے۔ آغا سراج درانی کا شمار پیپلزپارٹی کے سینئر رہنماؤں میں ہوتا تھا، آغا سراج درانی کو 2 مرتبہ اسپیکر سندھ اسمبلی منتخب ہونے کا اعزاز حاصل تھا۔
میاں منظور احمد وٹو:
سابق وزیراعلیٰ پنجاب میاں منظور احمد وٹو بھی اسی سال انتقال کر گئے، میاں منظور احمد وٹو کا تعلق حویلی لکھا سے تھا، ان کا انتقال 95 برس کی عمر میں ہوا ہے، وہ سابق وزیراعلیٰ اور اسپیکر پنجاب اسمبلی بھی رہے ہیں۔
میاں محمد اظہر:
سینئرسیاستدان سابق گورنر پنجاب میاں محمد اظہر 22 جولائی کو انتقال کر گئے تھے۔ کارکن کی حیثیت سے اپنا سیاسی کیریئر شروع کرنے والے سیاستدان میاں محمد اظہر 1987ء میں لاہور کے میئر بنے جبکہ 1990 ءسے 1993ء تک گورنر پنجاب کے عہدے پر فائز رہے۔ اُن کی عملی سیاسی زندگی کی ابتدائی وابستگی مسلم لیگ ن کے ساتھ تھی اور بعد میں نوازشریف کی جلا وطنی کے دوران پاکستان مسلم لیگ ق میں شامل ہوگئے، بعدازاں اکتوبر 2011 میں پی ٹی آئی میں شمولیت اختیار کی اور فروری 2024 کے عام انتخابات میں این اے 129 سے ایم این اے منتخب ہوئے۔
ماہر معاشیات:
ڈاکٹر شمشاد اختر:
اسٹیٹ بینک آف پاکستان کی پہلی خاتون سابق گورنر اور نگران وفاقی وزیرِ خزانہ ڈاکٹر شمشاد اختر 23 دسمبر کو اسی سال انتقال کرگئی۔ ڈاکٹر شمشاد اختر عالمی سطح پر تسلیم شدہ ماہرِ معاشیات اور سفارت کار تھیں، انہوں نے اقوامِ متحدہ میں انڈر سیکرٹری جنرل اور ای ایس سی اے پی کی ایگزیکٹو سیکرٹری کے طور پر خدمات انجام دیں اور 2015 کے بعد کے ترقیاتی ایجنڈے کے لیے اقوامِ متحدہ کی ہم آہنگی کی قیادت کی، جبکہ جی 20 کے لیے اقوامِ متحدہ کی عالمی سطح کی رابطہ کار بھی رہیں۔
مزید پڑھیں:حمیرا اصغر کی موت کا معمہ، ڈی آئی جی جنوبی نے اہم حقائق بتادیے
ممتاز شخصیت اور شاعر:
ڈاکٹر عارفہ سیدہ زہرہ
عروف ماہر تعلیم، دانشور اور انسانی حقوق کی کارکن ڈاکٹر عارفہ سیدہ زہرہ 10 نومبر کو انتقال کر گئیں۔ ڈاکٹر زہرہ نےبطور خاص مشیر برائے تعلیم و قومی ہم آہنگی وزیراعظم کے ساتھ خدمات انجام دیں،نیز فارمن کرسچین کالج میں پروفیسر ایمرٹس،لاہور کالج فار ویمن یونیورسٹی کی سابق پرنسپل،اورقومی کمیشن برائے خواتین کی چیئر پرسن کے طورپربھی کام کیا،انہوں نے اردو ادب اور فکری تاریخ میں مہارت حاصل کی اور معاشرتی و نسائی مسائل پر کھل کر اظہار رائے کیا۔
تجمل کلیم
پنجابی زبان کے معروف اور معتبر شاعر تجمل کلیم بھی اسی سال دنیا سے رخصت ہوئے۔ معروف پنجابی شاعر تجمل کلیم جنہیں ادبی حلقوں میں استاد کلیم کے نام سے بھی جانا جاتا تھا، پنجابی شاعری میں اپنے منفرد انداز اور گہرے فکری اظہار کے باعث نہایت معتبر مقام رکھتے تھے۔
شوبز شخصیات:
عائشہ خان
سینئر پاکستانی اداکارہ عائشہ خان جون 2025 میں 77 برس کی عمر میں انتقال کر گئیں۔ ان کی لاش کراچی کے علاقے گلشنِ اقبال میں واقع فلیٹ سے برآمد ہوئی، جہاں وہ تنہا رہ رہتی تھیں۔ پڑوسیوں کی اطلاع پر پولیس نے فلیٹ کا دروازہ توڑا، جبکہ رپورٹس کے مطابق ان کا انتقال ایک ہفتہ قبل ہو چکا تھا۔
حمیرا اصغر
اداکارہ و ماڈل حمیرا اصغر علی کی پُراسرار موت نے سب کو چونکا دیا۔ ان کی لاش جولائی 2025 میں کراچی کے علاقے ڈیفنس فیز 6 میں واقع فلیٹ سے ملی، جبکہ میڈیکل رپورٹس کے مطابق ان کا انتقال کئی ماہ قبل ہو چکا تھا۔ وہ گزشتہ سات برس سے تنہا مقیم تھیں۔
انور علی
سینئر اداکار انور علی ستمبر 2025 میں مداحوں سے بچھڑے۔ وہ گردوں کی بیماری اور فالج کا شکار تھے۔ طبیعت بگڑنے پر انہیں اسپتال منتقل کیا گیا تاہم وہ جانبر نہ ہو سکے، ان کی نمازِ جنازہ اور تدفین ماڈل ٹاؤن لاہور میں ہوئی۔
جاوید کوڈو
سینئر اداکار جاوید کوڈو اپریل 2025 میں انتقال کر گئے۔ وہ طویل عرصے سے مختلف بیماریوں میں مبتلا تھے اور کئی ماہ سے بستر تک محدود تھے۔ ان کے بیٹے شیرا معروف کامیڈین ہیں اور نجی ٹی وی کے مشہور پروگرام کا حصہ رہے ہیں۔
عزیر عباسی
اداکار عزیر عباسی جو شمون عباسی کے چچا تھے، 30 اکتوبر 2025 کو انتقال کر گئے۔ شمون عباسی نے فیس بک پر ان کے انتقال کی خبر مداحوں سے شیئر کی تھی۔ عزیر عباسی کئی ڈراموں میں اپنی اداکاری کے باعث جانے جاتے تھے۔
بینا مسرور
دسمبر 2025 میں سینئر اداکارہ اور ماہرِ تعلیم بینا مسرور 67 برس کی عمر میں انتقال کر گئیں۔ وہ بنجارا، بیٹیاں، تڑپ، عشق نہیں آسان، آنگن، اگر اور جانِ جہاں جیسے مشہور ڈراموں کا حصہ رہیں۔
حمیرا عابد
اس کے علاوہ مئی کے مہینے میں پاکستانی فلم اسٹار اور سپر ماڈل اداکارہ ایمان علی کی والدہ اور اداکار عابد علی کی اہلیہ مشہور اداکارہ حمیرا عابد بھی انتقال کرگئیں جنہوں نے پی ٹی وی کے سنہرے دور میں شوبز میں اپنے کیریئر کا آغاز کیا تھا۔
لکی ڈیئر
کامیڈین اور تھیٹر، ٹی وی و فلم کے کہنہ مشق فنکار لکی ڈیئر ستمبر 2025 کو لاہور میں انتقال کرگئے۔ 60 سالہ فنکار آٹھ ماہ سے پھیپھڑوں اور ذیابیطس کے مرض میں مبتلا تھے اور میو ہسپتال میں زیرِ علاج تھے۔
عشرت عباس
پاکستان ٹیلی وژن کے سینئر اور نامور اداکار عشرت عباس بھی اسی سال دل کا دورہ پڑنے کے باعث انتقال کر گئے۔ عشرت عباس کا شماران فنکاروں میں ہوتا تھا جنہوں نے اپنی زندگی کا بیشتر حصہ پاکستان ٹیلی وژن کے ساتھ وابستگی میں گزارا۔
شیف ذاکر قریشی
مشہور پاکستانی شیف ذاکر قریشی اپریل 2025 میں 58 برس کی عمر میں چل بسے تھے۔ وہ مصالحہ ٹی وی کے مقبول کوکنگ شوز کے باعث گھر گھر پہچانے جاتے تھے۔ وہ طویل عرصے سے گردوں کی بیماری میں مبتلا تھے۔
سوشل میڈیا اسٹار:
عمر شاہ
نوجوان سوشل میڈیا اور مین اسٹریم سیلیبریٹی عمر شاہ بھی ستمبر 2025 میں سب کو اداس کرگئے۔ ان کے اہلِ خانہ کے مطابق رات گئے طبیعت خراب ہونے کے بعد الٹی ان کے پھیپھڑوں میں چلی گئی، جس کے باعث آکسیجن کی کمی کے بعد انہیں دل کا دورہ پڑا۔
ثناء یوسف
چترال سے تعلق رکھنے والی نوجوان ڈیجیٹل کری ایٹر ثناء یوسف کو مئی 2025 میں اسلام آباد میں قتل کر دیا گیا تھا۔ رپورٹس کے مطابق ملزم نے ان کے گھر میں داخل ہو کر فائرنگ کی، جس سے وہ موقع پر ہی جاں بحق ہوگئی تھیں۔ ثناء کی تدفین چترال میں انکے آبائی قبرستان میں کی گئی۔
پیاری مریم
4 دسمبر 2025 کو معروف ڈیجیٹل کری ایٹر پیاری مریم جڑواں بچوں کی پیدائش کے دوران پیچیدگیوں کے باعث جہان فانی سے کوچ کرگئی تھیں۔ وہ اپنے وی لاگز میں معصومانہ انداز کے لیے جانی جاتی تھیں۔
مزید پڑھیں:ثناء یوسف نے قاتل کو مرنے سے قبل کیا کہا تھا؟
کھیل سے وابستہ شخصیت:
خضر حیات
پاکستان سے تعلق رکھنے والے سابق انٹرنیشنل امپائر خضر حیات بھی اسی سال لاہور میں انتقال کرگئے۔ وہ 70 کی دہائی میں امپائرنگ کی طرف آئے۔ ٹیسٹ، ون ڈے اور ڈومیسٹک میچز میں امپائرنگ کے فرائض انجام دیے۔ خضر حیات نے 1978 سے 1996 تک 34 ٹیسٹ اور 57 ون ڈے انٹرنیشنل میچز سپروائز کیے جن میں 1987، 1992 اور 1996 کے ورلڈکپ کے میچز بھی شامل ہیں۔
