-
-
کراچی کے مختلف علاقوں میں آج وقفے وقفے سے بوندا باندی متوقع ہے۔ محکمہ موسمیات کا کہنا ہے کہ کراچی میں مطلع ابر آلود رہے گا اور دن بھر سمندری ہوا کیساتھ موسم مرطوب رہنے کا امکان ہے۔
محکمہ موسمیات کا کہنا ہے کہ کراچی کے مختلف علاقوں میں ہلکی بارش اور بوندا باندی بھی متوقع ہے، ہوا میں نمی کا تناسب 69 فیصد ہے اور مغربی سمت سے 15کلو میٹر فی گھنٹہ کی رفتار سے ہوا چل رہی ہے۔
محکمہ موسمیات نے مزید کہا کہ کراچی کا زیادہ سے زیادہ درجہ حرارت 34 ڈگری سینٹی گریڈ رہنے کا امکان ہے۔ دوسری جانب محکمہ موسمیات کا کہنا ہے کہ ملک میں آج بھی کہیں ہلکی تو کہیں تیز بارش کا امکان ہے، مشرقی پنجاب،خطہ پوٹھوہار، بالائی خیبر پختونخوا،کشمیر اور ملحقہ پہاڑی علاقوں میں چند مقامات پر تیز ہواؤں اور گرج چمک کے ساتھ بارش ہونے کی توقع ہے۔
مزید پڑھیں:کراچی میں دھوپ چھاوں کا موسم، رات کو بونداباندی کا امکان
اسلام آباد اور گرد و نواح میں موسم گرم اور مرطوب رہنے کی توقع ہے، راولپنڈی، مری، گلیات، جہلم، اٹک، چکوال، لاہور، سیالکوٹ، خوشاب، گجرات، گوجرانوالہ، نارووال اور گرد و نواح میں چند مقامات پر بارش کا امکان ہے۔
سوات، دیر، بونیر، شانگلہ، کوہستان، بٹگرام، مانسہرہ، پشاور، ایبٹ آباد، مردان، مالاکنڈ، خیبر، باجوڑ، اورکزئی اورکوہاٹ میں بارش ہونے کی توقع ہے۔ بلوچستان کے بیشتر اضلاع میں موسم گرم اور مرطوب رہنے کا امکان ہے جبکہ کراچی سمیت سندھ کے ساحلی علاقوں میں چند مقامات پر بارش ہونے کی توقع ہے۔ آزاد کشمیر اور گلگت بلتستان میں تیز ہواؤں اور گرج چمک کے ساتھ چند مقامات پر بارش کا امکان ہے۔
گذشتہ چوبیس گھنٹوں کے دوران ملک کے بیشتر علاقوں میں موسم گرم اور حبس رہا تاہم اسلام آباد، شمال مشرقی پنجاب، خطہ پوٹھوہار، کشمیر اور بالائی خیبر پختونخوا میں تیز ہواؤں اور گرج چمک کے ساتھ بارش ہوئی۔
