گاڑی پانی میں ڈوب رہی ہو تو جان بچانے کیلئے کیا کرنا چاہیے؟

دریاؤں اور ندی نالوں میں طغیانی کے باعث ایسے واقعات پیش آسکتے ہیں جن میں گاڑیاں پانی کے بہاؤ کی زد میں آسکتی ہیں، ان حالات میں فوری ردعمل دینا آپ کی جان بچا سکتا ہے۔

نیشنل ہائی ویز اینڈ موٹر وے پولیس کے جانب سے جاری احتیاطی تدابیر کے مطابق ان حالات میں لوگوں کی جانب سے عام طور پر جو غلطی کی جاتی ہے وہ دروازہ کھولنے کی کوشش ہوتی ہے لیکن ایسا بالکل نہیں کرنا چاہیے۔

گاڑی کے باہر پانی کا دباؤ بہت شدید ہوتا ہے جس سے دروازہ کھولنا تقریباً ناممکن ہو جاتا ہے، اگر دروازہ کھل بھی جائے تو باہر سے زیادہ پانی اندر آئے گا جس سے گاڑی تیزی سے ڈوبنے لگے گی۔

مزید پڑھیں:ملک کے مختلف علاقوں میں اگلے 24گھنٹوں کے دوران شدید بارشوں کا امکان

اس کے بجائے گاڑی میں موجود شخص کو چاہیے کہ فوراً ہی اپنی طرف کا شیشہ نیچے کرے اور گاڑی سے باہر نکلے، اگر شیشہ نیچے نہ ہورہا ہو تو سیٹ کی پشت پر لگا ہیڈ ریسٹ نکالے اور اس کی دھاتی نوک استعمال کرتے ہوئے گاڑی کا پچھلا شیشہ توڑ کر باہر نکلے۔

اگر گاڑی پانی میں گر جائے تو کیا کرنا چاہیے؟ pic.twitter.com/2ZReFrH5Pp

— National Highways & Motorway Police (NHMP) (@NHMPofficial) July 25, 2025

گاڑی کا اگلا حصہ انجن کے باعث زیادہ وزنی ہوتا ہے اور اسی لیے پہلے ڈوبتا ہے جبکہ پچھلا حصہ کچھ دیر تک پانی کی سطح پر تیرتا رہتا ہے۔ یہی وہ وقت ہوتا ہے جب آپ کو فوری طور پر گاڑی سے باہر نکلنا ہوتا ہے۔ ان حالات میں چند لمحے اور درست فیصلہ آپ کی جان بچا سکتے ہیں۔