-
-
سندھ کابینہ نے پنشن اصلاحات، زرعی انکم ٹیکس رولز کی منظوری کے ساتھ تھر کول اور حب ڈیم منصوبے کیلیے فنڈز کی منظوری بھی دے دی ہے۔
پنشن اصلاحات کی منظوری:
وزیراعلیٰ سندھ مراد علی شاہ کی زیر صدارت صوبائی کابینہ کا اجلاس ہوا جس میں کابینہ نے پنشن اصلاحات کی منظوری دی۔ وزیراعلیٰ سندھ کے ترجمان کے مطابق پنشن اصلاحات کا نوٹیفکیشن محکمہ خزانہ جاری کرے گا۔
سندھ کابینہ نے لیبر ڈپارٹمنٹ کو ہدایت جاری کرتے ہوئے کہا کہ کم از کم اجرت کا نوٹیفکیشن جاری کیا جائے، اجرت کا نوٹیفکیشن جاری کرنے سے قبل تمام قانونی تقاضے پورے کیے جائیں۔
زرعی انکم ٹیکس رولز کی منظوری
سندھ کابینہ نے زرعی انکم ٹیکس رولز کی منظوری دے دی جس کے نئے قواعد کے تحت زمیندار سندھ ریونیو بورڈ (ایس آر بی) کے ساتھ رجسٹریشن کا پابند ہوگا۔ کابینہ نے چیئرمین ہیومن رائٹس کمیشن اقبال ڈیتھو کے خلاف الزامات کی جانچ کیلئے سب کمیٹی قائم کردی جس میں وزیر قانون، وزیر ایکسائز اور معاونِ خصوصی برائے انسانی حقوق شامل ہیں۔
مزید پڑھیں:سندھ کابینہ کے اہم فیصلے:خصوصی ٹریفک عدالتیں اورانسداد منشیات کورٹس کے قیام کی منظوری
سندھ کابینہ نے سکھر اور حیدرآباد میں انڈسٹریل انکلیو بنانے کی نھی منظوری دے دی ہے۔ حیدرآباد میں 951 ایکڑز دیھ گنجو ٹکر اور سکھر میں 400 ایکڑز روہڑی میں انڈسٹریل انکلیو قائم کیا جائے گا۔ ترجمان وزیراعلیٰ سندھ کے مطابق نئے انڈسٹریل انکلیو پبلک پرائیوٹ پارنٹرشپ کے تحت قائم ہونگے۔
گرلز اینڈ وومین ووکیشنل ٹریننگ سینٹر کی منظوری:
وزیراعلیٰ سندھ نے سندھ کابینہ کے اجلاس میں گرلز اینڈ وومین ووکیشنل ٹریننگ سینٹر بٹ خیلہ، ملاکنڈمیں قائم کرنے کی منظوری دیدی ہے۔ ترجمان وزیراعلیٰ سندھ کے مطابق سندھ کابینہ نے ووکیشنل ٹریننگ سینٹر قائم کرنے کیلئے ایک ارب روپے کی منظوری دیدی، یہ ووکیشنل سینٹر زیبسٹ قائم کرے گی۔
تھر کول منصوبہ:
سندھ حکومت نے تھر کول سے چھوڑ تک 105 کلومیٹر ریلوے لائن بچھانے کے لئے فنڈز کی منظوری دیدی۔ ترجمان وزیراعلیٰ سندھ نے کہا کہ وفاقی حکومت نے 7 ارب روپے مختص کیے تو سندھ حکومت بھی 7 ارب روپے دے گی، ریلوے لائن بچانے کا منصوبہ 42 ارب روپے مالیت کا ہے۔
حب ڈیم منصوبہ:
حب ڈیم کی مرمت کے لیے سندھ حکومت نے واٹر بورڈ کی جانب سے شیئر دینے کی منظوری دے دی ہے۔ ترجمان وزیراعلیٰ کے مطابق سندھ حکومت واٹر بورڈ کی طرف سے ایک ارب روپے فراہم کرے گی۔
