-
-
ماہرین نے خبردار کیا ہے کہ سوتے وقت استعمال کیا جانے والا تکیہ گردن اور ریڑھ کی ہڈی میں مستقل تکلیف کا باعث بن سکتا ہے اس لئے تکیے کا انتخاب کر تے ہوئے اسکے معیار کو ضرور جانچیں کیونکہ خریداری کے وقت صرف نرم اور آرام دہ ہونا اسکے بہتر ہونے کی ضمانت نہیں ہوتا۔
فزیوتھراپسٹ کا کہنا ہے کہ اکثر افراد تکیے کی ظاہری نرمی کو ہی اس کی خوبی سمجھ کر خرید لیتے ہیں جبکہ اسکی اصل خوبی کئی گھنٹے استعمال کے بعد ہی سامنے آتی ہے۔ اگر تکیہ سر کے وزن سے دب جاتا ہے اور مناسب سہارا برقرار نہیں رکھ پاتا تو اسکے نتیجے میں گردن اور ریڑھ کی ہڈی متاثر ہو سکتی ہے، اور صبح کے وقت گردن میں درد یا اکڑاو محسوس ہو سکتا ہے۔ اس لئے اصل تکیے کی اصل خو بی اس بات میں ہے کہ وہ پوری رات سر کو کس حد تک سہارا دے سکتا ہے۔
ماہرین کے مطابق انسانی سر کا اوسط وزن تقریباً ساڑھے چار کلوگرام ہوتا ہے، جس کی وجہ سے تکیہ رات بھر آہستہ آہستہ دبتا رہتا ہے۔ اگر تکیہ بہت زیادہ نرم ہو تو وہ سر اور گردن کو مطلوبہ سہارا فراہم نہیں کر پاتا۔
تحقیقی جائزوں کے مطابق لیٹیکس اور میموری فوم سے بنے تکیے گردن کے درد میں نسبتاً زیادہ مددگار ثابت ہو سکتے ہیں کیونکہ یہ رات بھر اپنی ساخت کو بہتر انداز میں برقرار رکھتے ہیں اور سر کو مناسب سہارا دیتے ہیں۔ پروں یا مصنوعی ریشوں سے تیار کیے گئے تکیے بھی استعمال کیے جا سکتے ہیں، تاہم ماہرین کا کہنا ہے کہ ان کی نسبتاً سخت اقسام کا انتخاب زیادہ مناسب رہتا ہے کیونکہ بہت زیادہ نرم تکیے وقت کے ساتھ جلد اپنی مضبوطی کھو دیتے ہیں۔
ماہرین مشورہ دیتے ہیں کہ اگر ممکن ہو تو تکیہ خریدتے وقت اس پر چند منٹ لیٹ کر دیکھنا چاہیے۔ ایسا تکیہ منتخب کرنا بہتر ہو سکتا ہے جو ابتدا میں قدرے مضبوط یا نسبتاً اونچا محسوس ہو، کیونکہ مسلسل استعمال کے ساتھ وہ خود بخود کچھ نرم ہو جاتا ہے۔ ان کے مطابق گردن کی صحت کے لیے صرف آرام کا احساس کافی نہیں بلکہ مناسب سہارا فراہم کرنا زیادہ اہم ہے۔
