-
-
امیر جماعتِ اسلامی کراچی منعم ظفر خان نے چیئرمین گلبرگ ٹاؤن نصرت اللہ کے ہمراہ فیڈرل بی ایریا بلاک 10 کے مرکز کھیل و ثقافت میں قائم کراچی کے پہلے بالکل مفت فٹنیس کلب کا افتتاح کر دیا۔
اس موقع پر خطاب کرتے ہوئے منعم ظفر خان نے کہا کہ کراچی میں نوجوانوں میں دل کے امراض، شوگر اور دیگر غیر متعدی بیماریوں میں تیزی سے اضافہ ہو رہا ہے۔ انہوں نے کہا کہ صرف ہسپتال بنانا کافی نہیں بلکہ بیماریوں کی روک تھام کے لیے صحت مند طرزِ زندگی کو فروغ دینا ضروری ہے۔ جماعتِ اسلامی اسی سوچ کے تحت شہر بھر میں پارکس، کھیلوں کے میدان اور عوامی تفریحی مقامات کو آباد کر رہی ہے
ٹاؤن چیئرمین نصرت اللہ نے کہا کہ گلبرگ ٹاؤن صرف میونسپل سروسز کی فراہمی تک محدود نہیں بلکہ منفرد عوامی فلاحی منصوبوں کے ذریعے شہریوں کو حقیقی ریلیف فراہم کرنے کی کوشش کر رہا ہے۔ انہوں نے کہا کہ یہ مفت فٹنیس کلب صحت مند معاشرے کی تشکیل کی جانب ایک اہم قدم ہے۔
انہوں نے بتایا کہ مرکز کھیل و ثقافت، بلاک 10میں قائم اس فٹنیس کلب میں جدید ورزشی مشینیں نصب کی گئی ہیں، جبکہ خواتین کے لیے روزانہ صبح 11 بجے سے شام 5 بجے تک خصوصی اوقات مقرر کیے گئے ہیں تاکہ وہ محفوظ اور باوقار ماحول میں ورزش کر سکیں اور صحت مند سرگرمیوں کا حصہ بنیں۔ چیئرمین یو سی 8 فاروق نعمت اللہ نے کہا کہ یونین کمیٹی میں مثالی ترقیاتی اور فلاحی منصوبوں پر کام جاری ہے۔
امیر جماعتِ اسلامی گلبرگ کامران سراج، قائم مقام چیئرمین یو سی 8 سعید موسیٰ اور ڈائریکٹر باغات ندیم حنیف نے بھی تقریب میں خطاب کیا۔ مقررین نے اس منصوبے کو عوامی فلاح، صحت مند طرزِ زندگی کے فروغ اور نوجوانوں کو مثبت سرگرمیوں کی جانب راغب کرنے کی ایک اہم کاوش قرار دیا۔
