پاسپورٹ آفس میں نقد فیس وصولی کا نظام ختم، ای پاسپورٹ جاری کرنے کا فیصلہ

ڈائریکٹوریٹ جنرل امیگریشن اینڈ پاسپورٹس نے آئندہ صرف ای پاسپورٹ جاری کرنے اور نقد کی جگہ ڈیجیٹل طریقے سے فیس کی وصولی کا اعلان کر دیا۔ تاہم موجودہ تمام مشین ریڈ ایبل پاسپورٹس اپنی مقررہ مدت تک مکمل قابلِ استعمال اورقابلِ قبول رہیں گے۔

ای پاسپورٹ مشین ریڈایبل پاسپورٹ کے مقابلے میں انتہائی محفوظ سفری دستاویز ہے اس میں ایک چپ لگی ہو تی ہے جس میں شہری کی شناخت ، ذاتی ڈیٹا، بائیو میٹرکس، ڈیجیٹل سائن اور ایک منفرد شناختی نمبر جیسی تفصیلات شامل ہوتی ہیں ۔ یہ امیگریشن کے عمل کو بھی تیز تر بناتے ہیں اور اس میں ردوبدل یا جعل سازی تقریباً ناممکن ہو تی ہے۔

ای پاسپورٹ بین الاقوامی سول ایوی ایشن آرگنائزیشن کے معیار کے عین مطابق ہے ، سفر کے دوران امیگریشن حکام پاسپورٹ کو خاص اسکینر کے ذریعے پڑھتے ہیں جس سے تصدیق کا عمل فوری اور غلطیوں سے پاک ہو جاتا ہے۔

دنیا کے 150 سے زیادہ ممالک میں ای پاسپورٹ استعمال ہو رہا ہے۔ پانچ سال میعاد کے 36 پیج والےای پاسپورٹ کی نارمل فیس 9000 روپے اور ارجنٹ1500 روپے۔۔ 72 پیج والے ای پاسپورٹ کی نارمل فیس 16500 روپے اور ارجنٹ 2700 روپے ہے جبکہ 10 سال میعاد والے 36 پیج ای پاسپورٹ کی نارمل فیس 13500 روپے اور ارجنٹ 22500 روپے 72 پیج ای پاسپورٹ کی نارمل فیس 24700 روپے اور ارجنٹ 40500 روپے ہے۔

پہلی مرتبہ ای پاسپورٹ اپلائی کرنے والے کو بائیو میٹرک ڈیٹا کے اندراج کے لیے ذاتی طور پر اصل شناختی کارڈ اور فیس کی ادائیگی کے ثبوت کے ہمراہ پاسپورٹ آفس جانا لازمی ہے۔ حکام کے مطابق ڈیجیٹل کیو آر کوڈ کے ذریعےہو گی جبکہ جلد ہی موبائل ایپ بھی متعارف کروائی جارہی ہے جس سے اندرون وبیرون مقیم پاکستانی گھربیٹھے پاسپورٹ اپلائی اور اپنی دہلیز پرہی اسے وصول کرسکیں گے۔