-
-
کراچی میٹروپولیٹن یونیورسٹی میں وزیراعظم یوتھ لیپ ٹاپ اسکیم کے تحت مستحق اور باصلاحیت طلبا میں لیپ ٹاپ تقسیم کرنے کی تقریب منعقد ہوئی جس میں 103 طلبا کو لیپ ٹاپس دیئے گئے۔ تقریب کے مہمانِ خصوصی گورنر سندھ نہال ہاشمی تھے، جنہوں نے طلبہ میں لیپ ٹاپ تقسیم کیے۔
تقریب کا آغاز تلاوتِ کلام پاک اور قومی ترانے سے ہوا۔ استقبالیہ خطاب کرتے ہوئے وائس چانسلر کراچی میٹروپولیٹن یونیورسٹی پروفیسر ڈاکٹر وسیم قاضی نے کہا کہ وزیراعظم یوتھ لیپ ٹاپ اسکیم کے تحت منعقد ہونے والی یہ تقریب محض لیپ ٹاپ تقسیم کرنے کی تقریب نہیں بلکہ نوجوانوں کی صلاحیتوں پر اعتماد، تعلیمی قابلیت کے اعتراف اور روشن مستقبل میں سرمایہ کاری کا عملی مظہر ہے۔ انہوں نے کہا کہ یہ پروگرام اس عزم کی عکاسی کرتا ہے کہ پاکستان کا مستقبل تعلیم یافتہ، باصلاحیت اور ٹیکنالوجی سے آراستہ نوجوانوں کے ہاتھوں میں محفوظ ہے۔
انہوں نے کہا کہ اعلیٰ تعلیم صرف کلاس روم تک محدود نہیں رہی بلکہ تحقیق، جدت، ڈیجیٹل رسائی اور عالمی روابط اس کا لازمی جزو بن چکے ہیں۔ ایسے میں جدید ٹیکنالوجی تک رسائی طلبہ کے لیے ایک ضرورت بن چکی ہے، جو انہیں نہ صرف تعلیمی میدان میں آگے بڑھنے بلکہ تحقیق اور پیشہ ورانہ ترقی کے نئے مواقع سے بھی روشناس کراتی ہے۔
پروفیسر ڈاکٹر وسیم قاضی نے کہا کہ ’’آج ہم صرف لیپ ٹاپ تقسیم نہیں کر رہے بلکہ خوابوں، امنگوں کو تقویت دے رہے ہیں۔ یہ لیپ ٹاپ علم، تحقیق، جدت، تخلیقی صلاحیتوں، کاروباری مواقع اور عالمی رابطوں کے لیے راستہ فراہم کریں گے۔ مجھے یقین ہے کہ ہمارے طلبہ ان وسائل کو اپنی تعلیمی کامیابی، ذاتی ترقی اور معاشرے کی بہتری کے لیے مؤثر انداز میں استعمال کریں گے۔‘‘
انہوں نے حکومتِ پاکستان اور وزیراعظم یوتھ پروگرام کی کاوشوں کو سراہتے ہوئے کہا کہ یہ اقدامات ملک میں تعلیمی مواقع کو وسعت دینے اور نوجوانوں کو جدید دور کے تقاضوں سے ہم آہنگ کرنے میں اہم کردار ادا کر رہے ہیں۔
وائس چانسلر نے کہا کہ گورنر سندھ نہال ہاشمی کی بطور مہمانِ خصوصی شرکت نوجوانوں کی ترقی، اعلیٰ تعلیم کے فروغ اور انسانی وسائل کی بہتری کے لیے ملکی قیادت کے عزم کی عکاس ہے۔ ان کی موجودگی ثبوت ہے کہ حکومت نوجوانوں کو قومی ترقی کا بنیادی ستون سمجھتی ہے اور انہیں بااختیار بنانے کے لیے عملی اقدامات کر رہی ہے۔
طلبہ سے خطاب کرتے ہوئے انہوں نے کہا کہ وہ ان لیپ ٹاپس کو محض ایک الیکٹرانک ڈیوائس نہ سمجھیں بلکہ انہیں اپنی زندگی میں مثبت تبدیلی لانے کا ذریعہ بنائیں۔ انہوں نے طلبہ پر زور دیا کہ وہ جدید ٹیکنالوجی، مصنوعی ذہانت، تحقیق اور ڈیجیٹل اسکلز کے
حصول پر توجہ دیں تاکہ وہ نہ صرف اپنے لیے بلکہ ملک کے لیے بھی ترقی اور خوشحالی کے نئے راستے ہموار کر سکیں۔
انہوں نے اس امید کا اظہار کیا کہ لیپ ٹاپ حاصل کرنے والے طلبہ مستقبل میں اپنے اپنے شعبوں میں نمایاں کامیابیاں حاصل کریں گے اور کراچی میٹروپولیٹن یونیورسٹی کے ساتھ ساتھ پاکستان کا نام بھی روشن کریں گے۔
تقریب کے دوران ڈیجیٹل یوتھ حب کے حوالے سے خصوصی ویڈیو پریزنٹیشن بھی پیش کی گئی جس میں نوجوانوں کے لیے دستیاب جدید ڈیجیٹل مواقع، تربیتی پروگرامز اور آن لائن سہولیات کو اجاگر کیا گیا۔
گورنر سندھ نہال ہاشمی نے اپنے خطاب میں کہا کہ حکومت نوجوانوں کو بااختیار بنانے، ڈیجیٹل خلا کم کرنے اور تعلیم کے شعبے میں جدید سہولیات فراہم کرنے کے لیے سنجیدہ اقدامات کر رہی ہے۔ انہوں نے لیپ ٹاپ حاصل کرنے والے طلبا کو مبارکباد دیتے ہوئے اس امید کا اظہار کیا کہ وہ ان وسائل کو اپنی تعلیم، تحقیق اور مہارتوں کے فروغ کے لیے استعمال کریں گے۔
گورنر سندھ نہال ہاشمی نے اپنے خطاب میں کہا کہ وزیراعظم یوتھ لیپ ٹاپ اسکیم نوجوانوں کو جدید ٹیکنالوجی سے آراستہ کرنے کے لیے ایک مسلسل اور مؤثر قومی پروگرام ہے، جس کے تحت گزشتہ بارہ برسوں سے طلبہ میں لیپ ٹاپ تقسیم کیے جا رہے ہیں۔ انہوں نے کہا کہ نوجوانوں کو صرف نعرے دینے کے بجائے انہیں عملی مواقع، جدید وسائل اور عالمی معیار کی مہارتوں سے لیس کرنا وقت کی اہم ضرورت ہے۔
انہوں نے طلبہ کو وزیراعظم ڈیجیٹل یوتھ ہب سے بھرپور استفادہ کرنے کی تلقین کرتے ہوئے کہا کہ یہ صرف ایک پورٹل نہیں بلکہ نوجوانوں کے لیے ایک نئی دنیا ہے، جہاں تعلیم، ہنرمندی، روزگار، اسکالرشپس، انٹرن شپس، کاروباری مواقع اور کیریئر گائیڈنس سمیت متعدد سہولیات ایک ہی پلیٹ فارم پر دستیاب ہیں۔ انہوں نے کہا کہ نوجوان خود کو اس پلیٹ فارم پر رجسٹر کریں اور اپنی صلاحیتوں کے مطابق مواقع تلاش کریں۔
گورنر سندھ نے کہا کہ پاکستان کا مستقبل نوجوانوں سے وابستہ ہے اور حکومت کا ہدف ایک لاکھ نوجوانوں کو بین الاقوامی مواقع اور عالمی روزگار کی منڈیوں تک رسائی دلانا ہے۔ انہوں نے کہا کہ دنیا بھر میں اب ہنر مند اور تربیت یافتہ افرادی قوت کی مانگ بڑھ رہی ہے، لہٰذا نوجوانوں کو جدید ٹیکنالوجی، ڈیجیٹل مہارتوں اور پیشہ ورانہ قابلیت کے حصول پر توجہ دینی چاہیے۔
انہوں نے کہا کہ آج کا دور ٹیکنالوجی اور مصنوعی ذہانت کا دور ہے جہاں طب سمیت ہر شعبہ جدید ڈیجیٹل نظام سے منسلک ہو چکا ہے۔ “آج علاج، تشخیص اور تحقیق کے شعبوں میں جدید مشینری اور ٹیکنالوجی بنیادی کردار ادا کر رہی ہے۔ ایسے میں نوجوانوں کو صرف ڈگری حاصل کرنے تک محدود نہیں رہنا چاہیے بلکہ انہیں اپنے شعبوں میں مہارت، تحقیق اور قیادت کے اعلیٰ درجات تک پہنچنے کا عزم کرنا چاہیے۔”
طلبہ سے مخاطب ہوتے ہوئے گورنر سندھ نے کہا کہ “زندگی کا مقصد صرف ڈاکٹر بن جانا نہیں ہونا چاہیے بلکہ ایک بہترین ڈاکٹر، محقق، ماہر اور قائد بننا چاہیے۔ آپ کو اپنے شعبے میں ایسی نمایاں کامیابیاں حاصل کرنی ہیں جن سے یہ ثابت ہو کہ حکومت اور ریاست کی جانب سے فراہم کیے گئے یہ وسائل درست ہاتھوں میں پہنچے ہیں اور ان کا مقصد پورا ہوا ہے۔”
اس موقع پر وزیراعظم یوتھ پروگرام کے کوآرڈینیٹر ڈاکٹر فہد شفیق نے کہا کہ وفاقی حکومت نے نوجوانوں کی ترقی کو ہمیشہ ترجیح دی ہے اور رواں سال بھی وزیراعظم یوتھ پروگرام کے لیے خطیر بجٹ مختص کیا گیا ہے۔ انہوں نے بتایا کہ وزیراعظم ڈیجیٹل یوتھ انیشی ایٹو کا باضابطہ آغاز ہو چکا ہے جبکہ PM Youth Programme کا آن لائن پورٹل مسلسل فعال اور نوجوانوں کو مختلف مواقع فراہم کر رہا ہے۔
ڈاکٹر فہد شفیق نے کہا کہ ملک بھر کی 33 سرکاری جامعات میں لیپ ٹاپ تقسیم کا عمل مکمل ہو چکا ہے جبکہ چند جامعات میں آخری مراحل جاری ہیں۔ انہوں نے بتایا کہ اس مرحلے میں تقریباً 30 ہزار لیپ ٹاپ طلبہ میں تقسیم کیے گئے ہیں اور پہلی مرتبہ اس منصوبے کو مکمل طور پر مربوط، شفاف اور منظم انداز میں نافذ کیا گیا ہے۔ ان کے مطابق یہ اقدام نوجوانوں کی ڈیجیٹل ترقی، اعلیٰ تعلیم تک رسائی اور عالمی مسابقتی ماحول میں ان کی صلاحیتوں کو اجاگر کرنے کے لیے ایک اہم سنگ میل ثابت ہوگا۔
تقریب کے اختتام پر مہمانِ خصوصی اور معزز شخصیات کو شیلڈز پیش کی گئیں۔ وزیراعظم یوتھ لیپ ٹاپ اسکیم نوجوانوں کو جدید تعلیمی سہولیات فراہم کرنے کی جانب اہم قدم ہے تاکہ وہ جدید تقاضوں کے مطابق ملکی معیشت میں اہم کردار ادا کرسکیں۔
