عید الضحیٰ پر سنت ابراہیمی کی ادائیگی کیلیے کرکٹ اسٹار بھی پیش پیش

عید الضحی پر سنت ابراہیمی کی ادائیگی کے لئے پاکستانی کرکٹ اسٹار بھی پیش پیش نظر آرہے ہیں عید الضحی کا ذکر سابق کپتان سرفراز کے قربانی کے جانوروں کے بغیر ادھورا ہی لگتا ہے۔

سرفراز احمد ہر سال ہی عید قرباں پر خصوصی اہتمام کرتے ہیں ماضی کی طرح اس مرتبہ بھی سابق کپتان کے بیلوں کا چرچا ہے، سوشل میڈیا پر وائرل ہونے والی ایک ویڈیو میں سرفراز کو اپنے گھر کے باہر قربانی کے جانوروں کی دیکھ بھال اور انہیں گلی میں گھماتے دیکھا جا سکتا ہے سیاہ اور سفید رنگ کی جانوروں کی خوبصورت جوڑی دیکھنے سے تعلق رکھتی۔

فاسٹ بولر حارث روف نے بھی اس بار سنت براہیمی کی ادائیگی کے لئے اونچے قد کاٹھ کا ایک سفیدبیل پسند کیا ہے سابق پاکستان کرکٹ ٹیم کے کپتان بابر اعظم کے گھر کے باہر بھی خوب رونق لگی ہو ئی ہے، اس بار انہوں نے قربانی کے لئے اونٹ کی خریداری کی ہے جسے کافی خوبصورتی سے سجایا گیا ہے۔

ٹیسٹ کرکٹر احمد شہزاد کا رواں برس ڈھیر سارے بکرے قربان کرنے کا ارادہ لگتا ہے، منظر عام پر آنے والی ویڈیو میں احمد شہزاد ایک ڈیرے میں چارپائی پر لیٹے ہوئے ہیں اور درجن بھر بکرے انکی چارپائی پر رکھا سبز چارہ کھانے میں مصروف ہیں۔

سنت ابراہیمی کی ادائیگی کے لئے ٹیسٹ کرکٹر صائم ایوب کے بکرے اور بیل بھی انکے گھر پہنچ گئے ہیں۔ منظر عام پر آنے والی ایک ویڈیو میں سیاہ و سفید بکروں کی جوڑی اور ایک بیل کو انکے گھر پہنچتے ہوئے دیکھا جا کتا ہے ، صائم ایوب کا بھاری بھرکم اور خوبصورت سفید بیل بھی دیکھنے کے قابل ہے۔

ٹیسٹ کر کٹر خرم منظور نے بھی سوشل میڈیا پر منڈی کی ایک ویڈیو شیئر کی ہے جس میں ایک شخص کو بیل ٹہلاتے ہوئے دیکھا جا سکتا ہے ۔