کراچی میں سرکاری کالجوں میں انٹر میڈیٹ فرسٹ ایئر میں داخلوں کا آغاز

کراچی میں سرکاری کالجوں میں تعلیمی سیشن 27-2026 کے لئے انٹر میڈیٹ فرسٹ ایئر میں داخلوں کا سلسلہ شروع ہو گیا ہے۔

سندھ الیکٹرانک سینٹرلائزڈ کالج ایڈمیشن پروگرام کے تحت داخلے کے خواہشمند طلباء یکم جون سے آن لائن داخلہ فارم جمع کرا سکتے ہیں، فارم جمع کرانے کی آخری تاریخ 16 جولائی 2026 ہے جبکہ پہلی میرٹ لسٹ 22 جولائی کو جاری کی جائے گی اور کلاسوں کا آغاز 5 اگست سے ہو گا۔

اعلان کردہ پالیسی کے مطابق A-1 اور A گریڈ حاصل کرنے والے طلبہ کو شہر کے کسی بھی کالج میں اپنی پسند کے مطابق درخواست دینے کی سہولت حاصل ہوگی۔ تاہم B، C اور D گریڈ والے طلبہ کو مشورہ دیا گیا ہے کہ وہ اپنے متعلقہ زون اور رہائش کے قریب واقع کالجوں کا انتخاب کریں۔

داخلے نویں جماعت کے نتائج کی بنیاد پر ہوں گے یعنی جنہوں نے پچھلے سال نویں کا امتحان دیا اور اس سال میٹرک کا امتحان دے کر نتیجے کا انتظار کر رہے ہیں، ایسے طلبہ جنہوں نے تین سال تک میٹرک کے بعد داخلہ نہیں لیا وہ بھی داخلے کے اہل ہوں گے۔

آن لائن فارم بھرتے وقت نویں جماعت کی مارک شیٹ، طالب علم کا ب فارم یا شناختی کارڈ، والد کا قومی شناختی کارڈ، ڈومیسائل، پی آر سی، اور پاسپورٹ سائز تصاویر کا ہونا ضروری ہے ۔

آن لائن فارم جمع کرانے کے لئے SECCAPکی آفیشل ویب سائیٹ (https://seccap.dgcs.gos.pk/) پر جائیں اور اکاونٹ بنا کر لاگ ان ہوں رجسٹریشن کے بعد سامنے آنے والے فارم کو احتیاط سے پُر کریں۔ اپنی ذاتی و تعلیمی معلومات درج کریں، اس کے بعد اپنے مطلوبہ گروپ یعنی پری انجینئرنگ، پری میڈیکل، کمپیوٹر سائینس، کامرس، آرٹس یا ہوم اکنامکس کا انتخاب کریں اگلے مرحلے میں ترجیحی بنیاد پر کالجز کا انتخاب کریں، بہتر ہو گا کہ آپ کالجز کا انتخاب کرتے ہوئے گزشتہ سالوں کے میرٹ کا جائزہ لے لیں، مطلوبہ دستاویزات اپلوڈ کریں اور سبمٹ کردیں۔

درخواست فارم جمع کرانے کے بعد تصدیقی سلپ کو محفوظ کر لیں یا پرنٹ نکال لیں۔ میرٹ لسٹ اور کالج الاٹمنٹ کے نتائج جاری ہونے کے بعد طلباء اپنے CNIC یا ب فارم نمبر کے ذریعے پورٹل پر جا کر اپنے کالج کی معلومات حاصل کر سکتے ہیں۔