گوشت میں ضروری پروٹینز لیکن زیادہ کھانے سے تیزابیت کا بھی خطرہ

بریانی، کڑہائی گوشت، بھنا گوشت، تکے، سیخ کباب بہاری کباب، کلیجی اور پائے، بڑی عید کا موقع ہے تو طرح طرح کے مزیدار پکوان تو بنیں گے ہی اور اللہ کی نعمتیں دسترخوان پر سجی ہوں تو ان سے کون لطف اندواز ہونا پسند نہیں کرے گا۔

یہی سوچ کر ہم عید قرباں پر کچھ بے قابو سے ہو جاتے ہیں اور پھر نوبت اسپتال جانے تک کی آجاتی ہے۔ تو اللہ کی نعمتوں سے بلکل لطف اندوز ہوں مگر زرا اعتدال میں رہتے ہوئے اور احتیاط کے ساتھ کیونکہ گوشت بھی آپکا اپنا ہے اور پیٹ بھی آپ کا ہی ہے۔

طبی ماہرین کا کہنا ہے کہ گوشت میں انسانی صحت کے لیے ضروری پروٹینز ہوتے ہیں، اس لیے قربانی کا لذیذ گوشت اعتدال سے کھانے میں کوئی مضائقہ نہیں ہے، مگر بہت زیادہ کھانے سے معدے میں تیزابیت کا خطرہ پیدا ہوتا ہے۔ امراض قلب، ذیابیطس اور گردوں کے مرض میں مبتلا افراد کو کلیجی، گردے، مغز اور پائے کھانے سے پرہیز کرنا چاہیے۔

قربانی کے گوشت کو اچھی طرح پکانا مت بھولیں کیونکہ گوشت مناسب طریقے سے پکا ہوا نہ ہو تو پیٹ اورآنتوں کے مسائل بڑھ جاتے ہیں، اسی طرح باربی کیو بناتے ہوئے گوشت کو بہت زیادہ نہیں جلائیں کیونکہ ایسا کرنے پر ایسے کیمیکلز پیدا ہوتے ہیں جو خطرناک ہوسکتے ہیں۔

دو کھانے کے درمیان کم از کم 6 گھنٹے کا وقفہ ہونا چاہئے، تاکہ گوشت کو ہضم ہونے کے لیے مناسب وقت مل سکے اور اگر گوشت دیکھ کر ہاتھ روکنا مشکل ہوجائے تو پھر کچھ دیر تیز چہل قدمی کے لیے ضرور وقت نکال لیں تاکہ کھانا ہضم ہوسکے۔

ماہرین کا مشورہ ہے کہ عید کے دنوں میں گوشت کے استعمال کے ساتھ ساتھ پھل اور کھانے میں ادرک کا استعمال لازمی کیا جائے،گڑ کا استعمال بھی نظام ہاضمہ کو بہتر بناتا ہے۔ اور آپ عید پر قبض کا شکار نہیں ہونا چاہتے تو سلاد کا استعمال لازمی کریں اور ہاں مصالحے دار پکوان پر کولا مشروبات کا استعمال نقصان دہ ہوسکتا ہے, اسکی جگہ لیمو پانی یا سبز چائے کا استعمال کریں۔