حکومت کا نوجوانوں کیلیے لیپ ٹاپ فنانسنگ پروگرام، درخواست کیسے دیں؟

پاکستان میں ڈیجیٹل شمولیت کے فروغ اور زیادہ سے ذیادہ نوجوانوں کو تعلیم، ریموٹ ورک اور کاروبار کے لیے ضروری ٹیکنالوجی فراہم کرنے کے لئے وزیراعظم یوتھ پروگرام کے تحت حکومت نے طلبہ، فری لانسرز اور نوجوان کاروباری افراد کو بلاسود لیپ ٹاپ فنانسنگ فراہم کرنے کا اعلان کیا ہے۔

اسکیم کے تحت ڈیڑھ لاکھ سے ساڑھے چار لاکھ روپے تک بلا سود قرض فراہم کیا جائے گا۔ درخواست گزار کا 18 سے 30 سال کی عمر کا پاکستانی شہری اور رہائیشی ہونا جبکہ طالب علم ہونے کی صورت میں ایچ ای سی سے منظور شدہ ادارے میں زیرِ تعلیم ہونا ضروری ہے۔

امیدوار کے دستخط شدہ درخواست فارم کے ساتھ قومی شناختی کارڈ کی کاپی، شیڈول آف چارجز، یونیورسٹی ریفرنس، تعلیمی ثبوت کے لئے تازہ ڈگری یا ٹرانسکرپٹ کی کاپی جمع کرانی ہو گی۔ فری لانسر یا کاروباری نوجوانوں کو فری لانس پلیٹ فارم، پورٹ فولیو یا لنکڈ اِن پروفائل اور اگر پہلے سے کسی بینک یا ادارے سے قرض لیا ہے تو اس کی تفصیل بھی فراہم کرنا ہو گی۔

بیسک لیپ ٹاپ کے لئے زیادہ سے زیادہ 150,000 روپے، میڈیم لیپ ٹاپ کے لئے 300,000 روپے اور ایڈوانسڈ لیپ ٹاپ کے لئے زیادہ سے زیادہ 450,000 روپے قرض 80:20 کے تناسب سے بلا سود فراہم کیا جائےگا۔ قرض کی مدت زیادہ سے زیادہ 4 سال تک ہو سکتی ہے جبکہ 6 ماہ بعد قبل از وقت مکمل یا جزوی ادائیگی کی جا سکتی ہے۔

وزیر اعظم لیپ ٹاپ اسکیم کے لیے درخواستیں وزیر اعظم یوتھ پروگرام کی آفیشل ویب سائٹ پر جمع کرائی جاسکتی ہیں۔ درخواست جمع کرانے کے بعد متعلقہ بینک آپ کی درخواست کا جائزہ لے گا۔ طلبہ کے لیے یونیورسٹی تصدیق کرے گی اور پرائم منسٹر یوتھ پروگرام پورٹل کے ذریعے انڈرٹیکنگ فراہم کرے گی۔ اہل ہونے کی صورت میں بینک منتخب کیٹیگری کے مطابق لیپ ٹاپ فراہم کرے گا۔

طلبہ کے قرض کی رقم یونیورسٹی فیس میں شامل کی جا سکتی ہیں جبکہ فری لانسرز اور دیگر افراد کو اقساط خود ادا کرنا ہوں گی۔ ماہانہ اقساط … بینک اکاؤنٹ میں دستیاب رکھنا ضروری ہوگا۔