بینک سے رقم نکالنے کے بعد ڈکیتی کی وارداتوں سے بچنے کیلیے کن باتوں کا خیال رکھا جائے؟

بینک یا اے ٹی ایم سے رقم نکالنا ایک معمول کا عمل ہے مگر اکثر یہ خبریں سننے کو بھی ملتی ہیں کہ رقم لے کر نکلنے والا شہری سڑک پر لٹ گیا۔ سیکیورٹی ماہرین مشورہ دیتے ہیں کہ ایسی صورتحال میں محفوظ رہنے کے لئے ہمیشہ چوکنا رہنا، آپ اور رقم دونوں کے لئے انتہائی ضروری ہے۔

کراچی پولیس کے اعلی حکام کا کہنا ہے اس طرح کی وارداتیں عموما منظم انداز میں کی جاتی ہیں گروہ کے کچھ افراد باہر کار یا موٹر سائیکل پر موجود ہو تے ہیں جبکہ ایک یا دو ملزمان بینک کے اندر کسی بہانے سے بیٹھ کر ٹرانزیکشن کرانے والوں کی ریکی کرتے ہیں اور رقم لے کر نکلنے والے کی نشاندہی باہر بیٹھے افراد کو کر تے ہیں، اس لئے بینک کے اندر اور باہر غیر متعلقہ افراد پر نظر رکھیں۔

حکام نے بتایا ہے کہ کوشش کریں کہ کاونٹر پر رقم نمایاں نہ ہو اور اسے مخصوص لفاف یا بیگز میں لے کر نکلنے کے بجائے عام تھیلے یا کپڑوں کے اندرونی حصوں میں چھپا کر رکھیں، بینک سے نکل کر گھر یا آفس پہنچنے تک اپنے پیچھے آنے والی گاڑی یا موٹر سائیکل پر نظر رکھیں اگر شک ہو کہ کوئی پیچھا کر رہا ہے تو کسی رش والی جگہ یا قریبی تھانے کا رخ کریں۔

پولیس کے اعلی حکام کے مطابق جہاں تک ممکن ہو، بڑی رقم کیش کی صورت میں نکالنے کے بجائے آن لائن ٹرانسفر، پے آرڈر، یا موبائل بینکنگ ایپس کا استعمال کریں، بڑی رقم نکالنے کے لیے ہمیشہ ایک ہی بینک، ایک ہی وقت یا ایک ہی راستہ استعمال نہ کریں، مہینے کے آغاز یا مخصوص دنوں میں بڑی رقم نکالنے سے گریز کریں کیونکہ ان دنوں ڈکیتی کی وارداتوں کا خطرہ زیادہ ہوتا ہے۔

بینک میں یا باہر نکلتے وقت فون کالز یا میسجز میں مصروف نہ ہوں، اپنی توجہ اردگرد کے ماحول پر رکھیں اور بڑی رقم نکالتے وقت اکیلے جانے کے بجائے کسی قابلِ اعتماد شخص کو ساتھ لے جائیں۔ تنہا یا اندھیرے والی جگہوں پر لگے اے ٹی ایم کے بجائے شاپنگ مالز یا پرہجوم علاقوں میں موجود مشینوں کا انتخاب کریں۔