-
-
کراچی میں رائیڈہیلنگ کمپنی یانگو نے ڈرائیورز کی سہولت کیلئے ایک نیا فیچر متعارف کروادیا جسے “ڈرائیور آپریٹڈ ٹرپ پول” کا نام دیا گیا ہے۔ اس فیچر کے ذریعے یانگو نے ڈرائیورز کو اپنی پسند کے مطابق سواری منتخب کرنے کی سہولت فراہم کی ہے اور اسکے ساتھ ہی ڈرائیورز کو اضافی بونس حاصل کرنے کا بھی موقع فراہم کیا گیا ہے۔
یانگو کے ڈرائیورز کو ماضی میں ایک وقت میں صرف ایک ہی رائیڈ کی درخواست موصول ہوتی تھی اور معلومات بھی محدود ہوتی تھیں۔ مثال کے طور پر پک اپ تک کا فاصلہ، مکمل سفر کا فاصلہ، متوقع دورانیہ جیسی معلومات ڈرائیورز کو معلوم نہیں ہوتی تھیں۔ رائیڈ مسترد کئے جانے پر بھی جرمانے اور دیگر پابندیاں عائد ہوتی تھیں۔
یانگو کے نئے فیچر “ٹرپ پول” کے ذریعے اب ڈرائیورز کو ایک ہی وقت میں متعدد رائیڈرز کی درخواستیں اپنی ایپ اسکرین پر نظرآئیں گی اور ہر درخواست کے ساتھ اہم معلومات بھی درج ہوں گی جن میں ڈراپ آف لوکیشن، پک اپ تک کا فاصلہ، مکمل سفر کی لمبائی، متوقع دورانیہ اور بنیادی کرایہ جیسی معلومات شامل ہیں۔
ڈرائیورز کو یہ آزادی ہوگی کہ وہ اپنی پسند اور سہولت کے مطابق موصول ہونے والی مختلف رائیڈز کی ریکوئسٹ میں سے کوئی ایک قبول کرے۔ یانگو کے مطابق ڈرائیورز مختلف رائیڈز کا موازنہ کرکے اپنے لئے بہتر اور فائدہ مند سفر کا انتخاب کرسکیں گے۔ کراچی میں ٹریفک کی صورتحال ہر چند منٹ میں تبدیل ہوجاتی ہے تو اس نئے فیچر کے ذریعے ڈرائیورز کو زیادہ موثر طریقے سے کام کرنے میں مدد ملے گی۔
نئے فیچر میں ڈرائیورز کو اضافی بونس کا بھی موقع فراہم کیا جائے گا۔ یانگو کے مطابق یہ بونس لازمی نہیں ہوں گے، انکا مقصد ڈرائیورز کو ایسی رائیڈز قبول کرنے کیلئے حوصلہ افزائی کرنا ہے جو عام طور پر نظرانداز کردی جاتی ہیں۔ اسی طرح بنیادی کرائے کے ساتھ ساتھ ایک متحرک قیمتوں کا نظام بھی ڈرائیورز کو اپنی ایپ پر نظر آئے گا جو ڈرائیورز اور سروس دونوں کیلئے فائدہ مند ثابت ہوسکتا ہے۔
ماہرین کے مطابق یانگو کا ٹرپ پول فیچر ایسے ڈرائیورز کو واپس لانے کیلئے بھی مددگار ثابت ہوسکتا ہے جو سخت قواعد وضوابط کی وجہ سے یانگو کو چھوڑ چکے تھے۔ کراچی جیسے تیزرفتار شہر میں جہاں ہرسیکنڈ اور کلومیٹر اہمیت رکھتا ہے، ٹرپ پول کا فیچر مستقبل میں رائیڈہیلنگ کے نظام کو مزید بہتر بنانے کی صلاحیت رکھتا ہے اور کراچی میں کامیابی کے بعد اسے ملک کے دیگر شہروں میں بھی متعارف کروایا جاسکتا ہے۔
