-
-
ملک بھر سے پولیو کے خلاف کامیاب مہم کے نتائج سامنے آگئے ہیں۔
تفصیلات کے مطابق سال 2025 کے دوران پولیو ویکسینیشن کی 6 مہم چلائی گئیں، جن میں 5 ملک گیر تھیں، اس کے نتیجے میں پولیو کے رپورٹ ہونے والے کیسز 2024 میں 74 سے کم ہو کر 2025 میں 30 رہ گئے۔
نیشنل ایمرجنسی آپریشن سینٹر (اِی او سی) کا کہنا ہے کہ ستمبر کے بعد ملک بھر میں پولیو کا کوئی نیا کیس رپورٹ نہیں ہوا۔ اِی او سی کی رپورٹ کے مطابق بلوچستان اور پنجاب میں ایک سال کے دوران پولیو کا کوئی نیا کیس سامنے نہیں آیا۔
نیشنل ای او سی کے مطابق حالیہ انسداد پولیو مہم میں 98 فیصد سے زائد بچوں کو ویکسین دی گئی، 15 سے 21 دسمبر تک جاری رہنے والی مہم میں 4 کروڑ 46 لاکھ سے زائد بچوں کی ویکسینیشن کامیابی سے مکمل کی گئی۔
پولیو پروگرام کے بیان میں کہا گیا ہے کہ اگرچہ پولیو کیسز کی تعداد میں کمی آ رہی ہے، لیکن بیماری کے مکمل خاتمے تک پاکستان کی جدوجہد جاری رہے گی، وائرس اب بھی بعض زیادہ خطرے والے علاقوں میں گردش کر رہا ہے جس کے باعث مسلسل نگرانی نہایت ضروری ہے۔
