کراچی میں ای چالان آن لائن دیکھنے کا طریقہ کار

کراچی میں ای چالان سسٹم کے نفاذ کے بعد اگر آپ کو یہ فکر ہے کہ کہیں آپ کا چالان تو نہیں کٹ گیا، تو اس فکر سے آذاد ہوجائیں کیونکہ سندھ پولیس کی جانب سے چالان چیک کرنے کیلئے پہلے بائی پوسٹ اور ایپ پر دیکھنے کی سہولت موجود تھی تاہم اب سندھ پولیس نے آن لائن طریقہ کار بھی متعارف کروادیا ہے۔

ای چالان آن لائن دیکھنے کا طریقہ کار

ای چالان آن لائن دیکھنے کیلئے کسی بھی قسم کی رجسٹریشن وغیرہ بھی نہیں کروانی ہے، چالان دیکھنے کیلئے صرف گاڑی کا نمبر اور جس کے نام پر گاڑی رجسٹر ہے اسکا شناختی درکار ہوگا۔

مزید پڑھیں:ای چالان اگر گاڑی کے سابق مالک کو موصول ہو تو وہ کیا کریں؟

آن لائن چالان چیک کرنے کیلئے سندھ پولیس کی ویب سائٹ (www.sindhpolice.gov.pk) پر جائیں۔ ویب سائٹ اوپن ہونے پر ہوم پیج پر ہی بائیں جانب نیچے کی طرف Online Public Services کا آپشن نظر آئے گا۔ اس آپشن پر کلک کرنے پر ایک نیا پیج اوپن ہوگا جس پر سندھ پولیس کی مختلف سروسز سے متعلق آپشن موجود ہیں۔

بائیں جانب سب سے پہلا آپشن Track Your E-Challan کا ہے اس آپشن پر کلک کرنے پر ایک اور نیا پیج اوپن ہوگا اور یہیں پر آپکو چالان دیکھنے کیلئے شناختی کارڈ اور گاڑی کا نمبر درج کرنے کا آپشن نظر آئے گا۔ ان باکسز میں شناختی کارڈ اور گاڑی کا نمبر درج کرنے پر اگر آپکا چالان ہوا ہے تو اسکی تفصیلات سامنے آجائیں گی۔

چالان نہ ہونے کی صورت میں No record کا آپشن پاپ اپ ہوگا جسکا مطلب آپکا کوئی چالان نہیں ہوا ہے۔ اگر آپ ای چالان کی ایپ اپنے موبائل میں انسٹال کرنا چاہتے ہیں تو وہ بھی آپکو سندھ پولیس کی ویب سائٹ پر
Online Public Services کے آپشن میں ہی ملے گی جہاں سے اس ایپ کو موبائل میں ڈاؤن لوڈ کرکےانسٹال کیا جاسکتا ہے لیکن ابھی یہ ورژن صرف اینڈرائیڈ کیلئے دستیاب ہے۔

اسکے علاوہ سندھ پولیس کا محکمہ ہر چالان کی ایک کاپی رجسٹرڈ پتے پر بھی ارسال کرتا ہے۔