کراچی کی تمام سڑکوں پر چارجڈ پارکنگ فیس لینے پرمکمل پابندی عائد

کراچی میں تمام سڑکوں پر چارجڈ پارکنگ فیس لینے پرمکمل پابندی عائد کردی گئی ہے۔ سندھ حکومت کی جانب سے 25 ٹاؤنز میں جاری پارکنگ فیس مکمل ختم کرنے کا نوٹیفکیشن بھی جاری کردیا گیا ہے۔

تفصیلات کے مطابق وزیر اعلی سندھ کی ہدایت پر محکمہ بلدیات نے شہر بھر میں پارکنگ فیس لینے پرمکمل پابندی لگا دی ہے، تمام ٹاؤن میونسپل کارپوریشنز کو فیس ختم کرنے اور فوری عملدرآمد کی ہدایات بھی کی گئی ہیں۔

نوٹیفکیشن کے مطابق پارکنگ فیس اب صرف پلازہ، پلاٹس یا مخصوص کونسلز کے مخصوص علاقوں میں لی جائے گی، غیر قانونی طور پر شہریوں سے پارکنگ فیس لینے والوں کے خلاف کارروائی کی جائے گی، پارکنگ فیس وصولی بند نہ کرنے والی میونسپل اتھارٹیز کے خلاف فوری ایکشن لیا جائے گا۔

میئر کراچی کے مطابق پارکنگ فیس کا خاتمہ عوامی مفاد میں کیا گیا ہے، شہر بھر میں اب کوئی بھی ادارہ سڑکوں پر پارکنگ فیس وصول نہیں کرسکے گا۔ واضح رہے کہ میئر کراچی نے وزیر اعلی سندھ سے پارکنگ فیس ختم کرنے کی درخواست کی تھی، بلدیہ عظمی کراچی کی حدود میں پہلے ہی پارکنگ فیس کی وصولی پر پابندی لگادی گئی تھی۔