-
-
اٹلس ہونڈا لمیٹڈ نے وفاقی بجٹ کی منظوری کے بعد موٹر سائیکلوں کی قیمت میں 2 ہزار روپے سے 6 ہزار روپے تک کا اضافہ کردیا۔قیمتوں میں اضافہ یکم جولائی 2025 سے نافذ العمل ہوگیا ہے۔
’سی ڈی-70‘ دو ہزار روپے اضافے کے بعد ایک لاکھ 59 ہزار 900 کی جبکہ’سی ڈی-70 ڈریم کی قیمت 2 ہزار روپے اضافے کے بعد ایک لاکھ 70 ہزار 900 روپے کی ہوگئی جب کہ ہونڈا پرائیڈر کی قیمت میں 3 ہزار روپے کا اضافہ ہوا ہے جس کے بعد اس کی نئی قیمت 2 لاکھ 11 ہزار 900 روپے ہوگئی ہے۔
اسی طرح’سی جی-125‘ کی قیمت 4 ہزار روپے اضافے کے بعد 2 لاکھ 38 ہزار 900 روپے ہوگئی، جب کہ اس کے سیلف اسٹارٹ اور گولڈ ورژن کی قیمتوں میں بھی 4،4 ہزار روپے کا اضافہ ہوا ہے جو اب بالترتیب 2 لاکھ 86 ہزار 900 اور 2 لاکھ 96 ہزار 900 روپے میں فروخت ہوں گی۔
اٹلس ہونڈا کے مہنگے ماڈلز پر سب سے زیادہ اثر پڑا ہے، ’سی بی-125ایف‘ کی قیمت میں 6 ہزار روپے کا اضافہ ہوا اور اس کی نئی قیمت 3 لاکھ 96 ہزار 900 روپے ہوگئی ہے۔اسی طرح، ’سی بی-150 ایف‘ 4 لاکھ 99 ہزار 900 اور ’سی بی-150 ایف‘ اسپیشل 5 لاکھ 3 ہزار 900 روپے ہوگئی ہے۔
کمپنی کے مطابق قیمتوں میں اضافہ حکومت کی جانب سے مالی سال 26-2025 کے وفاقی بجٹ میں موٹر سائیکل انجنز کی درآمد پر ایک فیصد کاربن لیوی لگانے کے بعد کیا گیا ہے۔ ڈیلرز کی جانب سے اٹلس ہونڈا کے موٹرسائیکلوں کی قیمت میں کیے گئے اس اضافے کی تصدیق کی ہے اور اس کی وجہ نئے ٹیکس کو قرار دیا ہے۔
