سانحہ خضدار: معصوم بچوں کی شہادت پر امریکی سفارتخانے کی شدید مذمت

بلوچستان کے ضلع خضدار میں اسکول بس پر ہونے والے بہیمانہ حملے کے بعد امریکی سفارتخانے نے گہرے دکھ اور افسوس کا اظہار کیا ہے۔ اسلام آباد میں امریکی ناظم الامور نٹالی بیکر نے اس حملے کو “ظالمانہ اور ناقابل معافی” قرار دیتے ہوئے کہا ہے کہ امریکہ اس سفاکانہ حملے کی سخت الفاظ میں مذمت کرتا ہے۔

نٹالی بیکر نے کہا، “ہم پاکستانی قیادت کے ساتھ مل کر خضدار، بلوچستان میں اسکول بس پر ہونے والے بے رحم اور ناقابل فہم حملے کی مذمت کرتے ہیں۔ معصوم بچوں کا قتل عقل و فہم سے بالاتر ہے۔ ہم ان خاندانوں کے غم میں برابر کے شریک ہیں جنہوں نے اپنے پیارے کھو دیے، اور ہماری دعائیں ان افراد کے ساتھ ہیں جو زخمی ہوئے۔”

مزید پڑھیں؛ خضدار: اسکول بس پر دہشتگردوں کا حملہ، 3 بچوں سمیت 5 افراد شہید

انہوں نے مزید کہا، “کسی بھی بچے کو اسکول جانے سے خوفزدہ نہیں ہونا چاہیے۔ ہم پاکستان میں ان تمام افراد کے ساتھ کھڑے ہیں جو اس تشدد کو ختم کرنے کی کوشش کر رہے ہیں۔”