کراچی میں درجہ حرارت میں اضافہ، آئندہ 24 گھنٹوں میں موسم کیسا رہے گا؟

کراچی میں مطلع جزوی ابرآلود رہنے کے ساتھ موسم گرم رہے گا۔ محکمہ موسمیات کا کہنا ہے کہ کراچی کا کم سے کم درجہ حرارت 20 ڈگری سینٹی گریڈ ریکارڈ کیا گیا ہے۔

محکمہ موسمیات کے مطابق شہر میں زیادہ سے زیادہ درجہ حرارت 34 ڈگری سینٹی گریڈ تک رہنے کا امکان ہے، ہوا میں نمی 87 فیصد ہے جبکہ مغربی سمت سے ہلکی رفتار سے ہوا چل رہی ہے۔ محکمہ موسمیات نے سندھ کے بیشتر اضلاع میں موسم خشک اور مطلع جزوی ابرآلود رہنے کا امکان ظاہر کیا ہے۔

دوسری جانب ملک کے مختلف حصوں میں بارش اور برفباری کا امکان ہے جبکہ بعض علاقوں میں موسم خشک رہے گا۔ محکمہ موسمیات کے مطابق اسلام آباد میں موسم سرد اور مطلع جزوی ابر آلود رہے گا، خیبرپختونخوا میں گرج چمک کے ساتھ بارش کی توقع ہے جبکہ چترال، دیر، سوات، مانسہرہ اور ایبٹ آباد میں برفباری ہو سکتی ہے۔

پنجاب میں موسم سرد اور جزوی طور پر ابر آلود رہے گا، راولپنڈی، مری، گلیات، جہلم، اٹک، سرگودھا اور میانوالی میں بارش ہونے کا امکان ہے۔ وسطی پنجاب میں بعض مقامات پر بارش کے ساتھ ژالہ باری بھی ہو سکتی ہے۔ بلوچستان میں کوئٹہ، زیارت، قلات اور بارکھان میں بارش اور پہاڑوں پر برفباری ہو سکتی ہے۔ کشمیر اور گلگت بلتستان میں موسم سرد اور مطلع ابر آلود رہنے کی توقع ہے۔