کراچی کے مختلف علاقوں میں صبح سویرے بارش، آج دن میں مزید بادل برسنے کا امکان

شہرقائد کے مختلف علاقوں میں علی الصبح بارش سے موسم خوشگوار ہوگیا ہے۔ محکمہ موسمیات نے آج مزید بادل برسنے کی پیشگوئی کی ہے۔

کراچی میں آج صبح سویرے آئی آئی چندریگر روڈ، صدر، لیاقت آباد سمیت دیگر علاقوں میں بارش ہوئی۔ لانڈھی، کورنگی، محمودآباد، بحریہ ٹاؤن میں بھی بادل برسے جس کے بعد پہلے سے سرد موسم میں مزید تیزی آگئی۔

محکمہ موسمیات کے مطابق 24 گھنٹوں کے دوران مطلع جزوی ابر آلود رہنے کا امکان ہے، اس کے ساتھ ہی شہر میں بوندا باندی اور ہلکی بارش کی بھی پیش گوئی کی گئی ہے۔

شہر کا کم سے کم درجہ حرارت 18ڈگری سینٹی گریڈ ریکارڈ ہوا جب کہ  زیادہ سے زیادہ درجہ حرارت 26 سے 28 ڈگری سینٹی گریڈ کے درمیان رہنے کا امکان ہے۔

محکمہ موسمیات کے مطابق آئندہ 24 گھنٹوں میں شہر کا کم سے کم درجہ حرارت 14 سے 16ڈگری سینٹی گریڈ تک رہنے کا امکان ہے۔ ہوا میں نمی کا تناسب 85 فیصد ہے اور شمال مشرق سے ہلکی رفتار سے ہوائیں چل رہی ہیں۔