-
-
سندھ حکومت نے محکمہ ایکسائز کے نارکوٹکس کنٹرول یونٹ کو مکمل فعال کرنے اور صوبے بھر میں آئندہ ہفتے سے منشیات فروشوں کے خلاف سخت کریک ڈاؤن کا فیصلہ کر لیا۔
اے آر وائی نیوز کی رپورٹ کے مطابق صوبائی وزیر ایکسائز و ٹیکسیشن شرجیل میمن نے اجلاس کی صدارت کے دوران اظہارِ خیال کیا کہ تمام اقسام کی منشیات کا خاتمہ یقینی بنایا جائے، کراچی میں نارکوٹکس کنٹرول یونٹ کی 16 ٹیمیں فعال کی جائیں۔
شرجیل میمن کا کہنا تھا کہ آئندہ ہفتے منشیات فروشوں کے خلاف کریک ڈاؤن کریں گے منشیات نسلوں کو تباہ کر رہی ہے اس کے خلاف مہم چلائی جائے گی۔ صوبائی وزیر نے ہدایت کی کہ والدین جب بچوں کو اسکول بھیجیں تو ان پر بھی نظر رکھیں۔
اجلاس میں گاڑیوں کی ری نیوئل کو ایکسائز ڈیوٹی کی ادائیگی سے مشروط کرنے کا بھی فیصلہ کیا گیا۔ شرجیل میمن نے ہدایت کی کہ گاڑیوں کیلیے روٹ پرمٹ کو بھی ٹیکس کی ادائیگی سے مشروط کیا جائے۔
ڈی جی ایکسائز نے اجلاس میں بریفنگ دی کہ ٹیکس نادہندہ گاڑیوں میں 50 فیصد گاڑیاں کمرشل ہیں۔ اس پر صوبائی وزیر نے ہدایت کی کہ ٹیکس کی ادائیگی نہ کرنے والے سرکاری محکموں سے بھی رابطے کیے جائیں۔
انہوں نے کہا کہ ٹیکس نادہندہ تمام گاڑیوں کو تحویل میں لیا جائے گا، بغیر رجسٹریشن کوئی بھی گاڑی شوروم سے نہیں نکلے گی، جلد قانون میں ترمیم کر کے نئی قانون سازی کی جائے گی۔
