کراچی سمیت صوبے میں آوارہ کتوں کی نس بندی،ویکسینیشن اور ٹیگنگ کا فیصلہ

کراچی سمیت سندھ بھر میں آوارہ کتوں کی افزائش نسل روکنے کے لئے نس بندی، ویکسینیشن اور انکی شناخت کے لئے ٹیگ لگائے جائیں گے۔

سندھ حکومت نے ٹاون میونسپل کارپوریشنز کے تعاون سے جامع منصوبہ تیار کرنے کا فیصلہ کرلیا، فیصلے کا مقصد صوبے بھر میں آوارہ کتوں کی تیزی سے بڑہتی ہوئی تعداد اور کتوں کے کاٹنے کےواقعات میں تشویشناک حد تک اضافے کی روک تھام ہے۔

کمشنر کراچی سید حسن نقوی نے روزنامہ ڈان سے گفتگو کرتے ہوئے بتایا کہ آوارہ کتوں کی آبادی کو کنٹرول کرنے کے لیے نئی حکمتِ عملی بین الاقوامی اصولوں اور عالمی ادارۂ صحت کی ہدایات کے مطابق تیار کی جائے گی، جس میں روایتی طور پر کتوں کو مارنے کے بجائے جانوروں کی افزائشِ نسل پر قابو پانے کے پروگرام پر توجہ دی جائے گی۔ جبکہ ڈپٹی کمشنر ساؤتھ جاوید نبی کھوسہ کے مطابق ضلع ساؤتھ میں آوارہ کتوں کی نس بندی کا کام پہلے ہی شروع ہو چکا ہے۔

ترجمان سندھ حکومت سیدہ تحسین عابدی نے اے آر وائی سے گفتگو کرتے ہوئے بتایا کہ سندھ میں گزشتہ 8 ماہ کے دوران 25 ہزار 500 سے زائد آوارہ کتوں کی نس بندی جبکہ 36 ہزار 900 کتوں کی ویکسینیشن مکمل کی جاچکی ہے۔ جبکہ اسی عرصے میں اینٹی ریبیز پروگرام کے تحت تقریباً 45 ہزار مریضوں کا علاج بھی کیا گیا۔

میڈیا رپورٹس کے مطابق سندھ میں رواں برس اب تک کتے کے کاٹنے کے ایک لاکھ سے ذائد کیسز رپورٹ ہو چکے ہیں، جبکہ کراچی کے صرف دو اسپتال انڈس اور جناح اسپتال کے ڈیٹا کے مطابق ان نو ماہ کے دوران 36 افراد جان کی بازی ہار چکے ہیں۔