کراچی میں ٹاون پریمیئرلیگ کا آغاز، ٹرافی اور ٹمیوں کی جرسیوں کی رونمائی

کراچی میں گراس روٹ کرکٹ کے فروغ کے لئے ٹاون پریمیئرلیگ کا آغاز کردیا گیا۔

اس حوالے سے ٹاون کی سطح پر ٹیپ بال ٹاون پریمیئر لیگ کی افتتاحی تقریب منعقد کی گئی، جس میں مہمان خصوصی صوبائی وزیر بلدیات اور لیگ کے پٹرن انچیف ناصر حسین شاہ تھے، ٹی پی ایل ٹیپ بال لیگ میں مجموعی طور پر 26 ٹیمیں حصہ لے رہی ہیں، جس میں ٹاونز کی25 ٹیمیں اور ایک ٹیم میئر کراچی کی شامل ہے۔

افتتاحی تقریب سے خطاب میں وزیر بلدیات ناصر حسین شاہ نے کہا سافٹ لانچنگ کی تقریب باقاعدہ طور پر ٹی پی ایل کے سفر کے آغاز کی علامت ہے، کھیلوں کی مثبت طاقت کے ذریعے کراچی کے تمام 25 ٹاؤنز کو ایک ساتھ لانے پر ٹی پی ایل کی ٹیم کو مبارکباد پیش کرتا ہوں، تمام ٹاؤنز کو اس لیگ میں شمولیت پر مبارکباد کے ساتھ ان کی حوصلہ افزائی کرتا ہوں۔

انہوں نے کہا میری گزارش ہے کہ تمام ٹاونز ٹی پی ایل کے منتظمین کے ساتھ مکمل تعاون کریں، ٹی پی ایل کا مقصد کراچی کے نوجوانوں احساس شمولیت، بنیادی سطح پر کرکٹ، مقامی صلاحیتوں، صحت مند مقابلے، اسپورٹس مین شپ اور کمیونٹی کی شرکت کو فروغ دینا ہے، ٹی پی ایل کے انعقاد میں سندھ حکومت کے محکمہ بلدیات کے منظوری اور تعاون سے کیا جارہا ہے، ٹی پی ایل کے زریعے کراچی کے نوجوانوں کو مثبت اور تعمیری مواقع فراہم کرنا ہے۔

ٹی پی ایل میں توجہ کھیل، نوجوان، اتحاد اور کمیونٹی کی شمولیت پر مرکوز ہے، اس میں تمام 25 ٹاؤنز منتظمین کے ساتھ مکمل تعاون اور ہم آہنگی سے کام کررہے ہیں، اس کے زریعے مقامی نوجوانوں کو اپنے اپنے ٹاؤنز کی نمائندگی کا زیادہ سے زیادہ موقع فراہم ہوگا۔ ٹی پی ایل کی افتتاحی تقریب میں لیگ کا تعارف، ٹرافی کی رونمائی، آفیشل نغمے اور ٹمیوں کی جرسیوں کی رونمائی بھی کی گئی۔