مسلسل 30 منٹ سے زیادہ بیٹھنے سے کینسر کا خطرہ، جدید تحقیق کیا کہتی ہے؟

روزانہ ایک ہی نشست میں آدھے گھنٹے یعنی صرف 30 منٹ سے زیادہ غیر متحرک بیٹھنا یا لیٹے رہنا کینسر کے باعث موت کے خطرات میں اضافہ کرتا ہے۔ جبکہ مسلسل غیر متحرک رہنے کے ہر اضافی گھنٹے کے ساتھ یہ خطرہ مذید بڑھتا جاتا ہے۔

اس بات کا انکشاف برطانوی اخبار گارڈین میں شائع ہونے والی گلاسگو یونیورسٹی کی ایک حالیہ تحقیق میں کیا گیا ہے جس میں محققین نے 10 برس کے دوران 90 ہزار سے زیادہ افراد کا جائزہ لیا ۔ تحقیق کے نتائج میں یہ بھی کہا گیا ہے کہ اگر 30 منٹ تک غیرمتحرک یا بیٹھے رہنے کے دوران جسمانی سرگرمی انجام دی جائے تو یہ خطرہ کم کیا جا سکتا ہے۔

محققین کے مطابق دفاتر میں بلخصوص بیٹھ کر کام سرانجام دینے والے افراد کا ہر آدھے گھنٹے بعد اُٹھ کر تھوڑی دیر چہل قدمی کرنا صحت کے لیے نہایت مفید ثابت ہو سکتا ہے چاہے یہ دفتر کے اندر ہی کیوں نہ کی جائے۔ عام طور پر ماہرین ورزش پر زور دیتے ہیں، مگر اس تحقیق کے مطابق ہلکی پھلکی حرکت بھی زندگی میں انتہائی اہم ثابت ہو سکتی ہے ۔

جیسے روزانہ ایک گھنٹہ بیٹھنے کے بجائے کپڑے استری کرنے یا برتن دھونے کی طرح کی ہلکی جسمانی سرگرمی سے موت کا خطرہ بارہ فیصد کم ہوسکتا ہے ۔ معمول کی رفتار سے چہل قدمی کرنے سے کینسر کا خطرہ آٹھ فیصد کم ہوسکتا ہے۔ جبکہ روزانہ پانچ منٹ غیرمتحرک رہنے اور پھر پانچ منٹ کی تیز جسمانی سرگرمی انجام دینے پر یہ خطرہ 22 فیصد تک کم کیا جاسکتا ہے۔ جبکہ روزانہ پانچ منٹ غیرمتحرک رہنے اور پھر پانچ منٹ کی تیز جسمانی سرگرمی انجام دینے پر یہ خطرہ 22 فیصد تک کم کیا جاسکتا ہے ۔