-
-
شہر میں نظم و ضبط، امن و امان کے قیام اور شہریوں کے جان و مال کے تحفظ کی ذمہ داری پولیس فورس پر عائد ہو تی ہے، اگر کسی شہر میں پولیس کی نفری مطلوبہ تعداد اور معیار کے مطابق نہ ہو تو جرائم کی روک تھام ممکن نہیں رہتی اور کراچی بھی اسی صورتحال سے دوچار ہے۔
سال 2023میں ہونے والی مردم شماری کے مطابق کراچی کی آفیشل آبادی 2 کروڑ 3 لاکھ سے زائد ہے تاہم اس میں وہ لاکھوں افراد شامل نہیں جو روزگار اور دیگر وجوہات کے سبب ملک کے دیگر شہروں سے کراچی میں مقیم ہیں۔ منصوبہ بندی کے بغیر قائم ہونے والی بے تحاشا پسماندہ بستیاں، بڑھتی ہوئی مہنگائی اور بے روزگاری وہ عوامل ہیں، جنہیں سماجی ماہرین جرائم میں اضافے کا سبب قرار دیتے ہیں۔
جیو نیوز میں شائع ایک رپورٹ کے مطابق کراچی میں پولیس کے تین زون ایسٹ، ویسٹ اور ساوتھ ہیں اور ان تین زونز کے 8 اضلاع میں 110 تھانے ہیں، ایسٹ زون میں تین اضلاع، ضلع ایسٹ، ضلع کورنگی اور ضلع ملیر شامل ہیں، جن میں ڈی آئی جی، ایس ایس پیز، ایس پیز، ڈی ایس پیز، ایس ایچ اوز اور مرد و خواتین سمیت 11 ہزار 500 اہلکاروں پر مشتمل نفری تعینات ہے۔
ویسٹ زون میں ضلع ویسٹ اور ضلع سینٹرل شامل ہیں، جن میں مجموعی طور پر اعلی افسران سے لے کر سپاہی تک 6750 کی نفری تعینات ہے۔ جبکہ ساوتھ زون میں ضلع ساوتھ، ضلع سٹی اور ضلع کیماڑی شامل ہیں، جن میں ایک ڈی آئی جی، تین ایس ایس پیز،7 ایس پیز، 17 ڈی ایس پیزاور 37 ایس ایچ اوز سمیت 8100 نفری تعینات ہے۔
کراچی میں جرائم کی روک تھام کیلئے مجموعی طور پر اعلی افسران، تفتیشی شعبے اور آپریشنل پولیس کو ملا کر 26350 کی نفری تعینات ہے جبکہ دیگر پولیس نفری میں 16152 افسران و اہلکار دفتری امور اور دیگر شعبوں میں تعینات ہیں۔ اس کے علاوہ وی وی آئی پی اور وی آئی پی سکیورٹی پر 5461 افسران و اہلکار تعینات ہیں۔
عالمی معیار کے مطابق تین سو سے چار سو شہریوں کیلئے ایک پولیس اہلکار کا ہونا ضروری ہے تاہم کراچی میں 774 شہریوں پر ایک پولیس اہلکار تعینات ہے۔ ان اعداد و شمار کو دیکھنے کے بعد یہ اندازہ لگانا مشکل نہیں کہ کراچی کے جرائم پر قابو پانا انتظامیہ کے لیے کیوں مشکل ہو گیا ہے۔
