-
-
تنظیم اسلام کے زیرِ اہتمام 3 ہفتوں پر مشتمل ملک گیر آگاہی مہم “اُمَّتِ مُسلمہ کی حالتِ زار اور راہِ نجات” کے عنوان سے 31 جولائی 2026 ء سے شروع ہورہی ہے۔
مرکزی ناظم نشرواشاعت و ترجمان تنظیم اسلامی رضاء الحق نے اپنے بیان میں کہا ہے کہ حقیقت یہ ہے پاکستان سمیت عالمِ اسلام کو جو حالات درپیش ہیں اُن سے نکلنے کے لیے ہمیں قرآن اور اسوۂ رسول ﷺ سے دوبارہ جُڑنا ہوگا، مملکتِ خداداد پاکستان کے تمام عوام و خواص کی توجہ اِس اہم ذِمّہ داری کی طرف مبذول کروانے کے لیے تنظیم اسلامی 31 جولائی تا 21 اگست2026ء کے دوران پاکستان بھر میں ’’اُمَّتِ مُسلمہ کی حالتِ زار اور راہِ نجات‘‘ کے عنوان سے ایک مہم کا انعقاد کر رہی ہے۔
انہوں نے کہا کہ مہم کا آغاز تنظیم اسلامی کے امیر شجاع الدین شیخ کے 31 جولائی کے خطابِ جمعہ سے ہوگا اور اِسی شام کو وہ کراچی پریس کلب میں ایک پریس کانفرنس سے بھی خطاب فرمائیں گے۔ مہم کے حوالے سے امیر تنظیم اسلامی کا خصوصی ویڈیو پیغام بھی نشر کیا جائے گا، مہم کے دوران لاہور، کراچی اور اسلام آباد میں مرکزی سیمینارز کا انعقاد ہوگا، جن میں معروف علماء کرام اور دانشور حضرات شرکت کریں گے اور اِس اہم موضوع پر گفتگو فرمائیں گے۔
ترجمان کے مطابق مہم کے دوران علماء کرام اور دیگر اہم ملکی شخصیات کے نام امیرتنظیم اسلامی کے خطوط بھیجے جائیں گے، موضوع پر متعددِ پریس ریلیزز کا اجراء ہوگا۔ مہم کے دوران پرنٹ،الیکٹرانک اور سوشل میڈیا پر اُمَّتِ مُسلمہ کو موجودہ اندوہناک حالت سے نکالنے کے لیے اسلام کے نظامِ عدلِ اجتماعی کی ضرورت واہمیت کو اجاگر کرنے کے لیے بھر پور دعوتی سرگرمیاں کی جائیں گی۔
رضاء الحق کا کہنا ہے کہ ملک بھر میں پاکستان کو حقیقی معنوں میں ایک اسلامی فلاحی ریاست بنانے کی ضرورت کو واضح کرنے کے لیے تشہیری مہم چلائی جائے گی، پاکستان بھر میں تنظیم اسلامی کے حلقہ جات مہم کے دوران دیگر سرگرمیوں کے علاوہ اہم دینی و سیاسی شخصیات سے ملاقات اور رابطہ کریں گے اور اُن تک امیر تنظیم اسلامی کا پیغام پہنچائیں گے، مہم کے عنوان کی مناسبت سے خطابات جمعۃ المبارک اور عوامی پروگراموں کے انعقاد کا اہتمام کیا جائے گا۔ علاوہ ازیں اُمَّتِ مُسلمہ کی نشاۃِ ثانیہ کے حوالے سے کرنے کے کاموں کی طرف ہر خاص و عام کو دعوت دینے کے لیے ملک بھر میں پُرامن ریلیاں منعقد کی جائیں گی۔
ترجمان تنظیم اسلامی نے کہا کہ ضرورت اس امر کی ہے کہ ملک میں موجود ظلم و زیادتی کی فضا اور طبقاتی کشمکش کو ختم کرنے کے لیے نفاذِ عدلِ اسلام کی طرف پیش قدمی کی جائے۔ حقیقت یہ ہے کہ اسلام کے عطا کردہ عادلانہ نظام ہی میں پاکستان کی بقاء مضمر ہے، جب تک اُمَّتِ مُسلمہ اللہ اور اس کے رسول ﷺ کے عطا کردہ نظام کی طرف نہیں لوٹے گی اُس وقت تک موجودہ بحران اور آپس کی خانہ جنگی سے نجات ممکن نہیں ہوسکتی۔
انہوں نے کہا عوام و خواص سے پُرزور اپیل کرتے ہوئے اُنہوں نے کہا کہ آئیے اُمَّت کی عظمت رفتہ کی بحالی اور پاکستان میں نظامِ مصطفی ﷺ کے نفاذ کی اجتماعی جدوجہد میں شریک ہوکر ہم سب اس عظیم فریضہ کی ادائیگی کے لیے اپنا کردار ادا کریں۔ اللہ تعالیٰ ہمارا حامی و ناصر ہو۔!
