وزیراعظم کا بیرون ملک ملازمت کے خواہشمندوں کو بلاسود قرض دینے کا اعلان

بیرون ملک ملازمت کے خواہشمندوں کے لئے وزیراعظم یوتھ پروگرام کے تحت نئی فنانسنگ سہولت متعارف کرادی گئی، اسکیم کے تحت منتخب افراد کو بلاسود قرض فراہم کیا جائے گا تاکہ ٹریننگ، ویزا، سفر اور ابتدائی سیٹلمنٹ کے اخراجات کو پورا کیا جاسکے۔

کتنا قرض فراہم کیا جائے گا؟

منتخب درخواست گزار کو زیادہ سے زیادہ 10 لاکھ روپے بلا سود قرض فراہم کیا جائے گا جسے زیادہ سے زیادہ 5 سال کے دوران واپس کرنا ہوگا فنانسنگ کا تناسب 80:20 یعنی 80٪ قرض اور 20٪ اپنی رقم پر مشتمل ہوگا۔ قبل از وقت مکمل یا جزوی ادائیگی کی سہولت دستیاب ہو گی، اسکیم میں انشورنس لازمی نہیں ہے۔

شرائط:

اسکیم کے تحت درخواست گزار کا درست قومی شناخت کا حامل، 21 سے 45 برس کے درمیان کا پاکستانی شہری ہونا ضروری ہے۔ آن لائن درخواست دینے کے لئے وزیراعظم یوتھ پروگرام کے آفیشل پورٹل پر دستیاب فارم درست معلومات کے ساتھ (https://pmybals.pmyp.gov.pk/POWF/Index) پر کریں، مطلوبہ دستاویزات اپ لوڈ کریں اور سبمٹ کردیں۔ رجسٹریشن اور رابطے کے لیے درخواست دہندہ کے اپنے نام پر رجسٹرڈ موبائل نمبر ہونا لازمی ہے۔

ضروری دستاویزات:

درخواست کے ساتھ قومی شناختی کارڈ کی کاپی پاسپورٹ سائز تصویر، پاسپورٹ بائیو پیج پاکستان مشن/ کمیونٹی ویلفیئر اتاشی، اوورسیز ایمپلائمنٹ پروموٹر اور پروٹیکٹر آفس سے تصدیق شدہ جاب آفر لیٹر، بیرونِ ملک ٹریننگ، ویزا، سفر اور سیٹلمنٹ اخراجات کی تفصیل، کمپنی کی تفصیلات، پروٹیکٹر رجسٹریشن نمبر اور تاریخ، تعلیمی اسناد، ٹیکنیکل تعلیم کے سرٹیفکیٹس، این ٹی این نمبر، آمدنی، بینک اکاؤنٹ اور قرض کی تفصیلات، اگر شریک قرض دارہو تو اسکی CNIC اور تصویر، پاسپورٹ کی تفصیلات، درخواست دہندہ سے رشتے کا ثبوت، پتہ اور رابطہ معلومات، ملازمت یا مالی تفصیلات بھی فراہم کرنی ہو گی۔

اسکے علاوہ دو حوالہ جات کے شناختہ کارڈ اور موبائل نمبر، یوٹیلٹی بل کا کنزیومر آئی ڈی اوررہائش کا ثبوت بھی دینا ہوگا۔ اسکیم کا مقصد ہنر مند افراد کا مالی بوجھ کم کرنا اور بیرونِ ملک روزگار کے فروغ کے زریعے ترسیلاتِ زر میں اضافے کے زریعہ معیشت کو مستحکم کرنا ہے۔