کے ایم سی سوئمنگ پول، ممبرشپ کا طریقہ کار اور پیکج کی تفصیلات

کراچی میں گرمی کی شدت میں اضافے کے ساتھ کراچی میٹروپولیٹن کارپوریشن (کے ایم سی) اسپورٹس کمپلیکس کا سوئمنگ پول تفریح کے لیے بہترین، جدید اور سستا ترین مقام بن کر ابھرا ہے اور اپنی جدید سہولیات اور منظم ممبرشپ سسٹم کی وجہ سے ہر عمر کے افراد کی توجہ کا مرکز بنا ہوا ہے۔

ڈائریکٹر اسپورٹس کے ایم سی، آفتاب قائم خانی نے سوئمنگ پول کی ممبر شب کے حوالے سے ٹائمز آف کراچی سے بات کرتے ہوئے بتایا کہ اس پیکج میں شہری کے ایم سی اسپورٹس کمپلیکس کی دیگر سہولیات بھی حاصل کرسکتے ہیں۔

سہولیات اور خصوصیات

کے ایم سی اسپورٹس کمپلیکس کے پیکج میں فراہم کی جانے والی سوئمنگ کے علاوہ دیگر سہولیات مندرجہ ذیل ہیں۔
جم gym، بیڈمنٹن کورٹس، ٹیبل ٹینس۔ جاگنگ ٹریک، بچوں کے لیے اسکیٹنگ ایریا، اور تیر اندازی ( archery) یہ تمام سہولیات ممبرشپ پیکیج کا حصہ ہیں۔

آفتاب قائم خانی کے مطابق سوئمنگ پول عالمی معیار کا ہے جس کی لمبائی 50 میٹر اور چوڑائی 21 میٹر ہے، جہاں قومی سطح کے مقابلے منعقد کیے جاتے ہیں۔ اس پول کی خاص بات اس کا ہیٹنگ سسٹم ہے، جو اسے کراچی کے ان چند پولز میں شامل کرتا ہے جہاں سردیوں میں بھی پانی کا درجہ حرارت برقرار رکھا جا سکتا ہے، صفائی کے لیے 24 گھنٹے فلٹریشن، روزانہ کیمیکل ٹریٹمنٹ، کلورینیشن اور ویکیوم کلیننگ کا خاص خیال رکھا جاتا ہے۔

اوقاتِ کار اور شیڈول

ڈائریکٹر اسپورٹس کے ایم سی کے مطابق، پول دو شفٹس میں کام کرتا ہے۔
صبح کی شفٹ: 6:00 بجے سے 9:00 بجے تک۔
شام کی شفٹ: 5:00 بجے سے 9:00 بجے تک۔
صفائی کا وقفہ: پیر سے بدھ تک صبح کی کلاسز صفائی اور ویکیومنگ کی وجہ سے بند رہتی ہیں، عام طور پر یہ پول شدید سردی میں بھی بند رہتا ہے اور مارچ میں دوبارہ کھلتا ہے۔ حال ہی میں اسے دو ماہ کی بندش کے بعد عوام کے لیے کھولا گیا ہے۔

عمر کی حد اور سیکھنے کی سہولت

ڈائریکٹر اسپورٹس کے مطابق پول کے استعمال کے لیے عمر کی کوئی سخت پابندی نہیں ہے، 6 سے 8 ماہ کے بچوں سے لے کر 90 سال سے زائد عمر کے بزرگ بھی یہاں آسکتے ہیں۔ نوآموز افراد کے لیے ماہر انسٹرکٹرز موجود ہیں، جو 10 سے 12 دن میں تیرنا سکھا دیتے ہیں۔

خواتین اور فیملیز کے لیے مخصوص دن رکھے گئے ہیں۔

مردوں کے لیے: ہفتے میں 5 دن۔
خواتین کے لیے: ہفتے میں 2 دن۔
فیملی ڈیز: بدھ اور ہفتہ۔

ممبرشپ کا طریقہ کار اور فیس

خواہشمند افراد کشمیر روڈ پر واقع کے ایم سی اسپورٹس کمپلیکس کے ایڈمن آفس سے رجوع کر سکتے ہیں۔ ممبرشپ کے لیے درخواست فارم کے ساتھ ضروری دستاویزات، شناختی کارڈ کی کاپی اور تصاویر جمع کرانی ہوتی ہیں، جس کے ایک ہفتے بعد کارڈ جاری کر دیا جاتا ہے، فیس کی ادائیگی سالانہ بنیاد پر ہوتی ہے۔

فیملی پیکیج، انفرادی ممبر شپ

ڈائریکٹر اسپورٹس آفتاب قائم خانی کے مطابق فیملی (میاں، بیوی اور 18 سال سے کم بچے) کیلیے ممبر شپ فیس 20 ہزار روپے ہے، جبکہ اگر انفرادی طور پر کوئی ممبر شپ لینا چاہیے گا تو اس کیلیے بھی فیس 20 ہزار روپے رکھی گئی ہے۔ ڈائریکٹر اسپورٹس کے مطابق ہر سال ممبر شپRenewal کرانے کیلیے 8 ہزار فیس لی جاتی ہے