کراچی میں ایشیا کی سب سے بڑی مویشی منڈی لگنے کو تیار، اس سال کیا نیا ہوگا؟

کراچی میں قربانی کے جانوروں کی ایشیا کی سب سے بڑی مویشی منڈی لگنے کو تیار ہے۔ ناردرن بائی پاس عوام دوست منڈی 2026 نے ملک بھر سے کراچی آنیوالے بیوپاریوں کے لیے آفرز لگادی ہیں۔

میڈیا سیل عوام دوست منڈی کا کہنا ہے کہ عوام دوست منڈی میں انٹری دینے والے ہر جانور کا میڈیکل چیک اپ فری ہوگا، چھوٹے جانور کو 8 لیٹر اوربڑے جانور کو 30 لیٹر پانی روزانہ مفت فراہم کیا جائے گا، بیوپاری اپنے ساتھ جتنا چاہیں چارہ لے آئیں کوئی روک ٹوک نہیں ہے، وی وی آئی بلاکس لگانے والوں کو خیمہ گزشتہ سال کی طرح ریاعتی نرخ پر ملے گا۔

عوام دوست منڈی کے مطابق 2026 میں بھی شہریوں کے لیے نادرن بائی پاس عوام دوست منڈی میں میلے کا سماں ہوگا، کراچی کے معروف پکوان اور برانڈز کا فوڈ اسٹریٹ میں اسٹالز کی بکنگ کےلیے رابطہ کیا ہے، عارضی اسٹالز، خیموں اور ہوٹلوں کیلئے قناتیں، بانس اور تیار چھپرے پہنچ گئے ہیں،

بیوپاریوں اور منڈی آنیوالے شہریوں کی سہولت کےلیے بیت الخلاء تیار کیا گیا ہے، عوام دوست منڈی کے ایڈمنسٹریٹریشن بلاک کی تیاریاں جاری ہیں اور کنٹینرز لگا دیے گئے ہیں، بیوپاریوں اور شہریوں کے تحفظ کے لیے سکیورٹی اہلکار الرٹ رہے گی۔