-
-
پاکستان ٹریول مارٹ 2026 میں پانچ سال کے بعد ٹورازم ملائیشیا کی بھرپور واپسی ہوئی ہے۔ کراچی ایکسپو سینٹر میں تین روزہ بین الاقوامی سیاحتی نمائش 3 سے 5 اپریل تک منعقد ہو رہی ہے، جس کا مرکزی موضوع “سیاحت کا مستقبل، جدت، پائیداری اور عالمی روابط” ہے۔
ٹورازم ملائیشیا کی شرکت 2019 کے بعد پہلی بار سامنے آئی ہے، جسے ماہرین پاکستان کی ٹریول مارکیٹ کے ساتھ دوبارہ مضبوط روابط قائم کرنے کی ایک اہم پیش رفت قرار دے رہے ہیں۔ اس موقع پر ملائیشیا کی جانب سے 8 نمایاں سیاحتی اداروں پر مشتمل وفد بھی شریک ہے، جو پاکستانی ٹریول ایجنٹس اور ٹور آپریٹرز کے ساتھ بزنس ٹو بزنس ملاقاتوں اور نیٹ ورکنگ سیشنز میں حصہ لے رہا ہے۔
اس حوالے سے ٹورازم ملائیشیا کے ڈائریکٹر نے کہا کہ پاکستان کے ساتھ سیاحتی تعاون کو مزید فروغ دینا ان کی ترجیحات میں شامل ہے، اس پلیٹ فارم کے ذریعے نہ صرف سیاحتی روابط کو وسعت دی جائے گی بلکہ فضائی رابطوں میں بہتری، پائیدار سیاحت نئے شعبوں جیسے (میٹنگز، انسینٹیوز،کانفرنسز اور ایگیزیبیشنز) اور تعلیمی سیاحت کو بھی فروغ دیا جائے گا۔
نمائش میں قائم ملائیشیا پویلین میں سیاحت کے مختلف پہلووں کو جدید انداز میں پیش کیا جا رہا ہے، جن میں تفریحی سیاحت، حلال سفری سہولیات اور کاروباری سیاحت شامل ہیں، اس کے ساتھ ساتھ میڈیا بریفنگز اور عوامی آگاہی سرگرمیوں کے ذریعے پاکستانی سیاحوں کے لیے خصوصی ٹریول پیکجز اور مشترکہ مارکیٹنگ منصوبوں کو بھی اجاگر کیا جا رہا ہے۔
اعداد و شمار کے مطابق سال 2025 کے دوران ایک لاکھ 35 ہزار سے زائد پاکستانی سیاحوں نے ملائیشیا کا رخ کیا، جو گزشتہ سال کے مقابلے میں تقریباً 28 فیصد اضافہ ظاہر کرتا ہے، یہ تعداد 2019 کی سطح سے بھی زیادہ ہے، جو دونوں ممالک کے درمیان بڑھتے ہوئے سیاحتی رجحان کی عکاسی کرتی ہے۔ فضائی سہولیات میں بھی نمایاں بہتری دیکھنے میں آئی ہے، جہاںباتک ایئر، ایئر ایشیا Xاور پاکستان انٹر نیشنل ایئر لائن کی جانب سے ہفتہ وار 14 پروازیں کراچی، لاہور اور اسلام آباد کو کوالالمپور سے منسلک کر رہی ہیں، جس سے سفر مزید آسان اور سہل ہو گیا ہے۔
ٹورازم ملائیشیا کی سرگرمیاں کراچی تک محدود نہیں بلکہ 7 اور 8 اپریل کو اسلام آباد میں روڈ شو کا بھی انعقاد کیا جا رہا ہے، جہاں ٹریول انڈسٹری اور میڈیا نمائندگان کے ساتھ مزید روابط کو فروغ دیا جائے گا۔ ماہرین کے مطابق پاکستان کے لیے ملائیشیا ایک پسندیدہ سیاحتی مقام کے طور پر ابھرتا جا رہا ہے، جہاں قدرتی حسن، متنوع ثقافت اور حلال دوستانہ سہولیات پاکستانی سیاحوں کے لیے خصوصی کشش رکھتی ہیں۔
