-
-
کراچی کے علاقے کریم آباد فرنیچر مارکیٹ کے قریب ٹریلر کی ٹکر سے موٹرسائیکل سوار 2 نوجوان بھائی جاں بحق ہوگئے۔ پولیس کے مطابق عزیز آباد کے رہائشی دونوں بھائی عید کی شاپنگ کے لیے نکلے تھے، ایک نوجوان نویں اور دوسرا دسویں جماعت کا طالبعلم تھا۔ پولیس نے جاں بحق نوجوانوں کی لاشیں اسپتال منتقل کردیں جبکہ فرار ہونے والے ٹریلر ڈرائیور کو پولیس نے گرفتار کرلیا۔
میرے واسطے قیامت ہوگئی: والد غم سے نڈھال
کراچی کے علاقے کریم آباد فرنیچر مارکیٹ کے قریب ٹریلر کی ٹکر سے موٹرسائیکل سوار 2 نوجوان بھائیوں کے جاں بحق ہونے پر والد غم سے نڈھال ہے، کالج کے چوکیدار والد محمود کا کہنا ہے کہ اس کی نوکری کا بس ایک سال باقی رہ گیا ہے اس کے بعد میرا کوئی آسرا نہیں ہے، میرے واسطے قیامت ہوگئی، میری تو زندگی اجڑ گئی۔
20 سال محنت کر کے بچے پالے تھے: والدہ
کریم آباد فرنیچر مارکیٹ کے قریب ٹریلر کی ٹکر سے جاں بحق 2 نوجوان بھائیوں کی والدہ کا کہنا ہے کہ میری دنیا اجڑ گئی، سب کچھ چلا گیا، میں نے 20 سال محنت کرکے اپنے بچے پالے تھے، انہیں بڑھایا، لکھایا، کام سیکھایا، سوچا کامیاب ہوں گے، ابھی وہ کما کر مجھے دیتے، نہیں پتا تھا وہ مجھے ایسے بے آسرا چھوڑ کر چلے جائیں گے۔ والدہ کا کہنا تھا دونوں بچے ٹیلر کے پاس عید کے کپڑے لینے گئے تھے، مجھے جانے سے پہلے میٹر سے بجلی کی تار بھی لگا کر دے کر گئے تھے، اتنے نڈر بیٹے تھے۔
میتیں تدفین کیلیے پنجاب روانہ
کراچی میں ٹریلر کی ٹکر سے موٹرسائیکل سوار جاں بحق 2 نوجوان بھائیوں کی نمازہ جنازہ پنجاب کے شہر حافظ آباد میں ادا کی جائے گی۔ والدہ کے مطابق وہ دونوں بیٹوں کی میت کو اپنے آبائی علاقے حافظ آباد لے جائیں گی اور وہاں ان کی تدفین کی جائے گی۔ دوسر جانب غم سے نڈھال والد کا کہنا ہے کہ اس کی نوکری کا بس ایک سال باقی رہ گیا ہے اس کے بعد ان کا کوئی آسرا نہیں ہے، میرے لیے یہ واقعہ قیامت ہے میری تو زندگی اجڑ گئی۔
