ایتھوپیا میں آتش فشاں پھٹنے سے راکھ پاکستان تک پہنچنے لگی، محکمہ موسمیات کا الرٹ جاری

ایتھوپیا میں دارالحکومت ادیس ابابا سے تقریباً 800 کلومیٹر دور افار ریجن میں 12 ہزار سال بعد ہیلی گُبی آتش فشاں پھٹ گیا۔ آتش فشاں پھٹنے کے اثرات سے متعلق پاکستان کے محکمہ موسمیات نے بھی الرٹ جاری کردیا ہے۔

میڈیا رپورٹس کے مطابق آتش فشاں پھٹنے سے نکلنے والا دھواں 46 ہزار فُٹ کی بلندی تک پہنچ گیا۔ راکھ کے بادل یمن ، عمان، بھارت، شمالی پاکستان تک پہنچے ہیں۔

محکمہ موسمیات کے ڈپٹی ڈائریکٹر انجم نذیر ضیغم نے بتایا ہے کہ آتش فشاں کی راکھ گوادر کے جنوب میں 60 ناٹیکل مائل پر دیکھی گئی۔ یہ راکھ عام سیٹلائٹ پر نظر تو نہیں آتی لیکن ایسے آلات موجود ہیں جسکی مدد سے اس راکھ کی نشاندہی کی جاسکتی ہے۔

انجم نذیر ضیغم نے بتایا کہ پاکستان کی تاریخ میں پہلی مرتبہ محکمہ موسمیات نے کسی آتش فشاں کے اثرات سے متعلق الرٹ جاری کیا ہے کہ کیونکہ آتش فشاں کی راکھ 45 ہزار فٹ بلندی پر تھی۔ پاکستان کی ڈومیسٹک پروازیں 34 سے 36 ہزار فٹ جبکہ بین الاقوامی پروازوں کے جہاز 40 سے 45 ہزار فٹ کی بلندی پر ہوتے ہیں اور آتش فشاں کی راکھ بین الاقومی پروازوں کے جہاز کے انجن کو متاثر کرسکتی ہیں۔

محکمہ موسمیات کے ڈپٹی ڈائریکٹر انجم نذیر ضیغم نے بتایا کہ یہ راکھ انتہائی بلندی پر موجود ہے اسکے زیراثر کراچی یا کسی دوسرے شہر میں فضائی آلودگی کا کوئی خطرہ نہیں ہے۔