-
-
بیرون ملک جیلوں میں قید پاکستانیوں کی تفصیلات وزیر خارجہ اسحاق ڈار کی جانب سے قومی اسمبلی میں پیش کردی گئیں ہیں۔
قومی اسمبلی کی رکن شہلا رضا کے سوال کے جواب میں وزیر خارجہ اسحاق ڈار کی جانب سے جمع کرائے گئے تحر یری جواب میں بتا یا گیا کہ مشرق وسطیٰ اور جنوب مشرقی ایشیا کے ممالک میں 15 ہزار 953 پاکستانی قید ہیں۔
وزیر خارجہ اسحاق ڈار نے بتایا 3 ممالک کے ساتھ ملزمان کی حوالگی کا معاہدہ ہونے کے باوجود وہاں پاکستانی قیدیوں کی تعداد 13 ہزار 852 ہے، ملزمان کی حوالگی کے معاہدے کے باوجود سب سے زیادہ پاکستانی قیدی سعودی عرب میں ہیں جن کی تعداد 10 ہزار 279 ہے۔
تحریری جواب میں بتایا گیا ہے کہ متحدہ عرب امارات میں 3523 اور کویت میں 50 پاکستانی قیدی ہیں جب کہ 2100 قیدی ان 14 ممالک میں قید ہیں جن کے ساتھ ملزمان کی حوالگی کا معاہدہ نہیں ہوا ہے۔
مزید پڑھیں:ممنوعہ اشیاء کے الزام میں کراچی سے عمرہ کیلئے جانیوالے تین افراد سعودی عرب میں گرفتار
وزارت خارجہ کے مطابق بحرین میں 581، عمان میں 252 ، قطر میں 599، ملائیشیا میں 459، تھائی لینڈ 35 اور کمبوڈیا میں 22 پاکستانی قید ہیں۔ تحریری جواب میں مزید بتایا گیا ہے کہ عراق میں 81، اردن میں 8، مصر میں 12، آسٹریلیا میں 27، جنوبی کوریا 7 اور جاپان میں 16 پاکستانی قید ہیں جب کہ فلپائن اور ویتنام میں ایک ایک پاکستانی قید ہے۔
