-
-
حوالدار لالک جان شہید نشان حیدر کا آج 26 واں یوم شہادت منایا جارہا ہے۔
وزیراعظم کا پیغام
وزیراعظم شہباز شریف، صدر مملکت آصف زرداری فیلڈ مارشل سید عاصم منیر چیف آف آرمی اسٹاف، چیئرمین جوائنٹ چیفس آف اسٹاف کمیٹی، چیف آف نیول اسٹاف، چیف آف ایئر اسٹاف اور مسلح افواج پاکستان کی جانب سے حوالدار لالک جان شہید نشانِ حیدر کو کارگل جنگ کے دوران مادر وطن کے دفاع میں بے مثال جرأت، غیر متزلزل عزم اور عظیم قربانی پر دل کی گہرائیوں سے خراج عقیدت پیش کیا گیا۔
وزیراعظم شہباز شریف نے دوران کارگل جنگ شہید ہونے والے حوالدار لالک جان کو خراج عقیدت پیش کرتے ہوئے کہا کہ لالک جان نے جان کی پرواہ کیے بغیر دشمن کے ناپاک عزائم کو خاک میں ملایا۔
دشمن کے حملے حوالدار لاک جان شہیدکے حوصلے پست نہ کر سکے، لالک جان کی بہادری، شجاعت اور فرض شناسی نسل نو کیلئے قابل تقلید مثال ہے،وزیراعظم نے کہا کہ قوم اپنے شہدا کی قربانیوں کو کبھی فراموش نہیں کر سکتی۔
وزیراعظم نے کہا کہ افواج پاکستان کے شہدا اور ان کے اہلخانہ مجھ سمیت پوری قوم کا فخر ہیں، وطن عزیز کی حفاظت کے غیر متزلزل عزم میں قوم افواج کے شانہ بشانہ کھڑی ہے۔
صدرمملکت کا پیغام
صدرمملکت آصف علی زرداری نے حوالدار لالک جان شہید نشان حیدر کو خراج عقیدت پیش کیا، صدرمملکت آصف زرداری نے شہید کی بہادری، جرات اور قربانی کو سلام پیش کیا اور کہا کہ قوم کارگل جنگ کے ہیرو کی جرات اور قربانی کو خراجِ تحسین پیش کرتی ہے۔
انہوں نے کہا کہ لالک جان شہید نے شدید زخمی ہونے کے باوجود دشمن کے حملے روکے،شہید کی بہادری اور حب الوطنی ہمیشہ یاد رکھی جائے گی، لالک جان شہید کی قربانی آئندہ نسلوں کے لیے روشن مثال ہے، ان کا کہنا تھا کہ ہم اپنے بہادر سپوت لالک جان شہید کی قربانی کو سلام پیش کرتے ہیں۔
صدر مملکت آصف زرداری نے کہا کہ قوم کو اپنے عظیم سپوت لالک جان شہید کی قربانی پر فخر ہے،شہید کی قربانی تاریخ میں سنہری الفاظ میں ہمیشہ یاد رکھی جائے گی۔
افواج پاکستان کا خراج عقیدت
پاک فوج کے شعبہ تعلقات عامہ آئی ایس پی آر کی جانب سے جاری بیان کے مطابق لالک جان شہید نے آج ہی کے دن 1999 میں دشمن کے تابڑ توڑ حملے بہادری سے پسپا کیے۔ شدید زخمی ہونے کے باوجود میدان جنگ سے نکلنے سے انکار کیا اور آخری دم تک دشمن کا مقابلہ کرتے ہوئے جام شہادت نوش کیا۔
مسلح افواج اور پوری قوم ان کی قربانی کو عظیم احترام اور شکر گزاری کے ساتھ یاد کرتی ہے۔ شہید کی قربانی ہمارے لیے مشعلِ راہ ہے اور موجودہ و آئندہ نسلوں کے لیے حوصلہ اور عزم کا استعارہ ہے۔
پاک فوج کے شعبہ تعلقات عامہ آئی ایس پی آر کے مطابق مسلح افواج اس عہد کی تجدید کرتی ہیں کہ شہداء پاکستان کے مقدس مشن مادر وطن کے دفاع کو جرأت، فرض شناسی اور عزت و وقار کے ساتھ جاری رکھیں گے۔
