-
-
پاکستان کے سب سے بڑے شہر کراچی میں ڈینگی وبا پر تاحال قابو نہیں پایا جاسکا۔ شہرقائد میں گزشتہ 24 گھنٹوں کے دوران ڈینگی کے 200 کے قریب نئے کیس رپورٹ ہوئے۔
محکمہ صحت سندھ کے جاری کردہ اعداد و شمار کے مطابق کراچی میں گزشتہ 24 گھنٹوں کے دوران ڈینگی وبا میں مبتلا 199 نئے مریض سامنے آئے۔
محکمہ صحت سندھ کا کہنا ہے کہ ضلع کورنگی میں 67 ڈینگی کیسز رپورٹ ہوئے، ضلع شرقی میں 51، ضلع وسطی میں 29، ضلع کیماڑی میں 19، ضلع جنوبی میں 18، ضلع غربی میں 9 اور ضلع کیماڑی میں 6 کیسز رپورٹ ہوئے۔
محکمہ صحت کے مطابق رواں سال سندھ میں ڈینگی وائرس سے ہلاکتوں کی تعداد 53 ہوگئی جن میں سے 47 کا تعلق کراچی سے ہے۔
رواں برس کراچی میں ڈینگی کے 13 ہزار 277 کیسز رپورٹ ہوئے جبکہ سندھ بھر میں رواں سال میں ڈینگی کیسز کی کل تعداد 16 ہزار 888 ریکارڈ کی گئی۔
