کراچی سیف سٹی پراجیکٹ فیز اا کے تحت مزید کیمرے نصب کرنے کا فیصلہ

کراچی کے مذید علاقے بھی اب سیکیورٹی کیمروں کی زد میں ہوں گے کیونکہ شہریوں کی جان ومال کے تحفظ اور جرائم کے تدارک کے ساتھ ای چالان کا دائرہ بھی وسیع کرنے کا فیصلہ کیا گیا ہے۔

وزیر اعلی سندھ سید مراد علی شاہ نے کراچی سیف سٹی منصوبے کے دوسرے فیز کی منظوری دے دی ہے۔ فیز ٹو کے تحت شہر میں مجموعی طور پر 2 ہزار 3 سو سے زائد اسمارٹ کیمرے نصب کیے جائیں گے۔ حکام کے مطابق 870 عمومی نگرانی، جبکہ 1,300 کیمرے آٹومیٹک نمبر پلیٹ ریکگنیشن اور چہرے کی شناخت سے لیس ہوں گے، 80 ٹریفک قوانین کے نفاذ، 56 موبائل سرویلنس یونٹس، اور 8 ٹریفک سگنل مانیٹرنگ کے لیے ہوں گے۔

کیمرے کراچی کے مختلف اضلاع میں نصب کیے جائیں گے ضلع جنوبی میں322 کیمرے، ضلع شرقی 220، کورنگی27، کیماڑی17، ملیر16 اور ضلع غربی میں 1 کیمرا نصب کیا جائے گا۔ حکام کے مطابق منصوبے کی مجموعی لاگت 9.98 ارب روپے ہے۔

منصوبہ کی تکمیل آئندہ 12 ماہ کے دوران متوقع ہے جبکہ منصوبے کا باقاعدہ آغاز مئی 2026 میں کیا جائے گا۔ منصوبے میں 9 پوائنٹس آف پریزنس، سولر اور جنریٹر بیک اپ، اسمارٹ سرویلنس ٹاور، 50 پبلک پینک بٹن، 8 رسپانس گاڑیاں اور 10 سرویلنس ڈرونز بھی شامل ہیں۔

وزیر اعلی سندھ کا کہنا ہے کہ سیف سٹی منصوبہ عوام کی سلامتی اور جرائم کے تدارک کے لیےانتہائی ضروری ہے، جدید ٹیکنالوجی کی مدد سے حفاظتی اقدامات کو مزید موثر بنائیں گے فیز ٹؤ کی تکمیل سے شہرکی سیکیورٹی، نگرانی اور قانون نافذ کرنے والے اداروں کی صلاحیت میں مزید اضافہ ہوگا۔