ملالہ کا پاکستانی طالبات کیلیے ‘ملالہ یوسُفزئی اسکالرشپ’ کا اعلان

نوبیل انعام یافتہ ملالہ یوسُفزئی نے پاکستانی طالبات کے لیے ‘ملالہ یوسُفزئی اسکالرشپ’ کا اعلان کر دیا ہے۔

سوشل میڈیا پر جاری ویڈیو پیغام میں ملالہ نے کہا کہ جب انہوں نے آکسفورڈ یونیورسٹی سے گریجویشن مکمل کی تو ان کے لیے یہ نہایت اہم تھا کہ وہ ان لڑکیوں کے لیے کچھ کریں جو تعلیم کے حق کے لیے جدوجہد کر رہی ہیں اور اعلیٰ تعلیم حاصل کرنا چاہتی ہیں۔

اسکالرشپ میں کون اپلائی کرسکتا ہے؟

ملالہ یوسفزئی نے اعلان کیا ہے کہ آکسفورڈ پاکستان پروگرام کے تحت ‘ملالہ یوسفزئی اسکالرشپ’ کے لیے درخواستیں اب کھلی ہیں، جو پاکستانی خواتین آکسفورڈ یونیورسٹی میں ماسٹرز یا اس سے اعلیٰ ڈگری حاصل کرنا چاہتی ہیں وہ درخواستیں دیں۔

انہوں نے خوشی کا اظہار کرتے ہوئے بتایا کہ یہ مکمل فنڈڈ اسکالرشپ پاکستانی خواتین کو اعلی تعلیم حاصل کرنے کا بہترین موقع فراہم کرے گی، خاص طور پر ان خواتین کو جو اپنی تعلیم کے ذریعے پاکستان میں مثبت تبدیلی لانے کا عزم رکھتی ہیں۔

ملالہ کے مطابق، اگر کوئی پاکستانی خاتون آکسفورڈ میں ماسٹرز یا اعلیٰ ڈگری حاصل  کرنے کا خواب دیکھتی ہے اور وطن واپس آ کر معاشرے کی بہتری کے لیے کام کرنا چاہتی ہیں تو یہ موقع ان کے لیے ہے۔

مزید پڑھیں:ملالہ یوسفزئی کا حکومت پاکستان سے افغان لڑکیوں اور خواتین کی ملک بدری روکنے کا مطالبہ

درخواستیں کہاں جمع کروائیں؟

درخواستیں جمع کرانے کے لیے امیدوار خواتین آکسفورڈ پاکستان پروگرام کی ویب سائٹ oxpakprogramme.org پر اپلائی کر سکتی ہیں۔ ملالہ یوسفزئی کا کہنا ہے کہ وہ نئی طالبات کو آکسفورڈ میں خوش آمدید کہنے کی منتظر ہیں۔