سندھ میں گاڑیوں کی خرید و فروخت کیلیے بائیومیٹرک تصدیق کی سہولت متعارف

نادرا نے سندھ میں رجسٹرڈ گاڑیوں کی خرید و فروخت کے لئے بائیومیٹرک تصدیق کی سہولت متعارف کرادی۔

گاڑیوں کی خرید وفروخت اور ملکیت کی منتقلی کے لئے محکمہ ایکسائز اینڈ ٹیکسیشن سندھ کی جانب سے لازمی قرار دی گئی بائیومیٹرک تصدیق کا مسئلہ نادرا حکام نے حکومت سندھ کے تعاون سے حل کر دیا گیا۔

اب سندھ میں رجسٹرڈ گاڑیوں کی خرید و فروخت کے لئے نادرا آفس یا ای سہولت سینٹر سے خریدار و بیچنے والے کی شناخت کی تصدیق ممکن ہو سکے گی۔ آپ یہ کام گھر بیٹھے نادرا کی پاک آئی ڈی ایپ کے زریعے بھی کر کے ٹرانسفر کی مزید کارروائی مکمل کرسکتے ہیں۔ بائیو میٹرک تصدیق کے بعد اسٹامپ پیپر پر تحریری معاہدہ تیار کیا جائے گا جس پر دونوں فریق دستخط کریں گے۔

ضروری کن دستاویزات:

بائیو میٹرک تصدیق کے عمل کے بعد سوک سینٹر کراچی میں قائم ایکسائز آفس جائیں، ٹوکن حاصل کریں اور درخواست فارم جمع کروائیں، ٹرانسفر کے درخواست فارم کے ساتھ اصل رجسٹریشن بک یا اسمارٹ کارڈ خریدار اور فروخت کرنے والے کے قومی شناختی کارڈ کی کاپی اور تصاویر فریقین کے دستخط شدہ درخواست فروخت کا معاہدہ، کلیئرنس سرٹیفکیٹ ویلیڈ وہیکل ٹیکس سرٹیفکیٹ خریدار کی رہائش کا ثبوت (یوٹیلیٹی بل یا کرایہ نامہ) اور گاڑی کا معائنہ سرٹیفکیٹ بھی جمع کرانا لازمی ہو گا۔

گاڑی منتقلی کی فیس:

گاڑی منتقلی کی مقررہ فیس اور ٹوکن ٹیکس آن لائن یا ایکسائیز آفس میں جمع کرائی جا سکتی ہے۔ موٹر سائیکل کی ٹرانسفر فیس 605 روپے جبکہ 800 سے 1000 سی سی کار کی ٹرانسفر فیس 2000 روپے ہے۔ درخواست وصولی کے بعد باضابطہ رسید جاری کی جائے گی تمام تر دستاویزات کی تصدیق اور پرسس مکمل ہونے کے بعد 15 ورکنگ دنوں میں گاڑی خریدار کے نام پر کر دی جائے گی۔