سندھ کی جامعات کے ڈائریکٹر فنانس کی تنخواہوں میں اضافہ

وزیر اعلیٰ سندھ مراد علی شاہ نے سندھ ہائر ایجوکیشن کمیشن کے چیئرمین پروفیسر ڈاکٹر طارق رفیع کی سفارش پر صوبے کی سرکاری جامعات میں کم تنخواہیں لینے والے ڈائریکٹر فنانس کی تنخواہوں میں اضافے کی منظوری دے دی ہے۔

جیو نیوز کے مطابق سندھ حکومت کی جانب سے تنخواہوں میں اضافے کا باقاعدہ نوٹیفکیشن جاری کردیا گیا ہے۔ محکمہ بورڈز و جامعات کے سیکشن افسر کمال احمد کے جاری کردہ نوٹیفکیشن کے مطابق ایم پی اسکیل Ilکے تحت جامعات کے ڈائریکٹرز فنانس کی تنخواہ اب 448280 روپے ہوگئی ہے۔

میڈیا رپورٹ کے مطابق نوٹیفکیشن میں کہا گیا ہے کہ ڈی ایف کی بنیادی تنخواہ 263,180 روپے ہوگی، گھر کے کرائے کی مد میں 95,700 روپے، یوٹیلیٹیز کی مد میں 11,970 روپے اور منافع کی مد میں 77,430 روپے ملیں گے، اس کا اطلاق فوری ہوگا۔

مزید پڑھیں:سندھ اسمبلی کے منتخب  نمائندوں کی تنخواہ اور مراعات میں اضافے کی تجویز

میڈیا رپورٹ کے مطابق چیئرمین سندھ ایچ ای سی پروفیسر ڈاکٹر طارق رفیع نے ایک سمری بھی وزیر اعلیٰ سندھ کو ارسال کی تھی جس میں کہا گیا تھا کہ وفاقی طور پر چارٹرڈ جامعات، پنجاب اور خیبرپختونخوا کے صوبوں میں ڈائریکٹر فنانس کو BPS-20 میں مستقل بنیادوں پر تعینات کیا جاتا ہے تاہم ڈائریکٹر فنانس کا تقرر بلوچستان میں BPS-20/21 میں 4 سال کی مدت پر کیا جاتا ہے۔

سمری میں مزید کہا گیا تھا کہ کم تنخواہ پیکیج کی وجہ سے کئی جامعات میں ڈائریکٹرز فنانس جوائن نہیں ہوئے یا جوائن کرنے سے انکار کردیا، اس خلا کو پُر کرنے کے لیے حکومت سندھ نے سرچ کمیٹی کی سفارشات پر کئی ڈائریکٹرز فنانس کا تقرر ویٹنگ لسٹ سے کیا۔

سمری کے مطابق ڈائریکٹر فنانس کے عہدے کی اہمیت کو مد نظر رکھتے ہوئے اور یونیورسٹیوں میں اہل افراد کو برقرار رکھنے کے لیے چیئرمین سندھ ایچ ای سی نے دوبارہ سفارش کی کہ وزیر اعلیٰ سندھ برائے مہربانی ڈائریکٹر فنانس کی تنخواہ کم از کم 5 لاکھ روپے مقرر کریں۔