عمرے کیلیے ویزا حاصل کرنا پہلے سے آسان ہوگیا، نئی  سروس متعارف

سعودی حکومت نے غیر ملکی عمرے کے خواہشمند مسلمانوں کے لیے بڑا اقدام اٹھالیا ہے، جس کے بعد ویزا حاصل کرنا پہلے سے آسان ہوگیا ہے۔

عرب میڈیا رپورٹس کے مطابق سعودی وزارت حج و عمرہ نے بیرون ملک مقیم عمرے کے خواہشمند افراد کے لیے ’نسک عمرہ‘ سروس کا آغاز کیا ہے۔ اس آن لائن سروس کی مدد سے عمرہ زائرین بغیر کسی ایجنٹ یا ثالث کے براہِ راست ویزا کے لیے درخواست دے سکیں گے۔

میڈیا رپورٹس کے مطابق نسک عمرہ ڈیجیٹل پلیٹ فارم کے ذریعے عمرہ زائرین رہائش، ٹرانسپورٹ اور ٹورز جیسی سہولتیں بھی آن لائن بک کر سکیں گے۔ وزارت حج و عمرہ کا کہنا ہے کہ ان سہولتوں کا حصول (https://umrah.nusuk.sa/ ) کے ذریعے ممکن ہے۔ مذکورہ پلیٹ فارم سے زائرین اپنی خواہش اور سہولت کے مطابق مربوط یا علیحدہ علیحدہ پیکجز حاصل کرسکتے ہیں۔

مزید پڑھیں:موبائل ڈیٹا کے بغیر روضہ شریف کا پرمٹ نسک ایپ سے حاصل کریں

نسک عمرہ پلیٹ فارم کا مقصد سروس کے معیار کو بہتر بنانا اور زائرین کے تجربے کو بہتر بنانا ہے۔ اگر کسی زائرین کو آن لائن ایپ کے استعمال میں دشواری پیش آ رہی ہے تو مذکورہ پلیٹ فارم پر منظور شدہ ٹریول ایجنٹس کی تفصیلات بھی فراہم کی جا رہی ہیں جن کے ذریعے بھی درخواست جمع کروا سکتا ہے۔

وزارت حج و عمرہ کے مطابق اس سروس کا آغاز سعودی عرب کے ویژن 2030 کے اہداف کو حاصل کرنے کے لیے وزارت کی کوششوں کا حصہ ہے جس کے تحت زیادہ سے زیادہ مسلمانوں کی میزبانی اور حج و عمرہ کی خدمات کے معیار کو بہتر بنا کر زائرین کے مجموعی تجربے کو بہتر بنانا شامل ہے۔