-
-
کراچی میں 18 اگست سے مون سون بارشوں کا نیا سلسلہ شروع ہونے کا امکان ہے۔ محکمہ موسمیات کا کہنا ہے کہ پیر کو شہر میں ابتدا میں معتدل بارش کا امکان جبکہ 20 اور21 اگست کو گرج چمک کےساتھ موسلادھار بارشوں کے نتیجے میں اربن فلڈنگ کی صورتحال پیدا ہوسکتی ہے۔
محکمہ موسمیات کےمطابق بھارتی راجستھان پر موجود سائیکلولنک سرکولیشن کے اثرات 18اگست کی شام تا رات کراچی میں داخل ہونگے، جس کے نتیجے میں ابتدائی طورپر ہلکی سے درمیانی شدت کی بارشوں کا امکان ہے جبکہ 20 اور21 اگست کو گرج چمک کےساتھ تیز اور موسلادھار بارشیں ہوسکتی ہیں۔
ایکسپریس نیوز سے گفتگو میں محکمہ موسمیات کے ترجمان انجم نذیرضیغم کا کہنا تھا کہ سسٹم سے متعلق سیٹلائٹ سے موصولہ تصاویر کے مطابق مون سون کا نیا سلسلہ اس وقت بھارتی راجستھان پر موجود ہے، جس کے تحت دیہی سندھ کے تھرپارکر اور عمرکوٹ کے قرب وجوار میں بارشوں کا سلسلہ جاری ہے۔
مزید پڑھیں:کراچی میں آج اور کل تیز بارش کا امکان، اربن فلڈنگ کا خطرہ
انجم نذیر کے مطابق پیرکی شام تا رات یہ سلسلہ کراچی کا رخ کرے گا جبکہ بدھ، جمعرات (20تا21اگست) کراچی میں تیز بارشوں کے کئی اسپیل متوقع ہے، جس کے نتیجے میں اربن فلڈنگ کی صورتحال پیدا ہوسکتی ہے۔ انجم نذیر کے مطابق ابھی ان بارشوں کی ملی میٹر میں پیش گوئی نہیں کی جاسکتی البتہ یہ سسٹم کبھی کبھار ہیوی بارشوں کا سبب بن سکتا ہے۔
کراچی میں آج موسم کیسا رہے گا؟
شہر قائد میں سمندری ہوائیں جزوی طور پر معطل ہونے کے باعث حبس کی کیفیت ہے اور گرمی کی شدت محسوس کی جارہی ہے۔ تفصیلات کے مطابق کراچی میں گرمی کی شدت میں اضافہ ہوگیا، شہر میں مطلع صاف اور سمندری ہوائیں جزوی طور پر معطل ہے جس ک باعث حبس کی کیفیت ہے۔
محکمہ موسمیات کا کہنا ہے کہ آج بھی مرطوب موسم کے ساتھ شام و رات میں بوندا باندی متوقع ہے جبکہ مغربی سمت سے 9 کلو میٹر فی گھنٹہ کی رفتار سے ہوا چل رہی ہے۔ محکمہ موسمیات کے مطابق شہر کی ہوا میں نمی کا تناسب 78 فیصد ریکارڈ کیا گیا ہے اور گرمی کی شدت 33 ڈگری تک محسوس کی جارہی ہے، دن میں درجہ حرارت 34 سے 36 ڈگری تک پہنچنے کا امکان ہے۔
